DIHA to’y panawagan si Joy Tumulak nga iyang gipakatap sa Facebook nga nag-awhag sa mga motorista ug pasahero gikan sa habagatang Sugbo nga mosayo ug balik aron malikayan ang dakong problema sa trapiko sa lungsod sa Minglanilla.
Ang panawagan ni Joy nasentro sa pagsira sa national highway gikan sa Tungkop lahos ngadto sa eskina sa Calajoan tungod sa street dancing nga kabahin sa tinuig nga Sugat-Kabanhawan Festival nga gihimo gahapon sa hapon hangtod na sa pagka gabii.
Sa mga nipatalinghug sa panawagan ni Joy siguradong nakalahos nga way bikil.
Sa mga wa makabalita sa iyang pahimagno posibling nagbagulbul kay natanggong.
Si Joy nga maoy gitahasan karon ni Gob. Hilario Davide III sa paghan-ay sa mga programa sa Kapitolyo labot sa trapiko nag-atubang karon ug bug-at nga tahas unsaon nga ang mga festival ug ubang kalihukan sa mga ciudad ug lungsod sa probinsiya di makabalda sa dagan sa trapiko.
Siguro punopuno na ang iyang listahan karon ni Joy, unsay sunod nga dapit nga nagplano pag gamit sa national highway alang sa ilang kalihukan.
KOORDINASYON
Tukma nga plano ug koordinasyon ang angayan nga ipatuman.
Sayod si Joy sa ka importante niini. Di mahimong mag-inusara siya ning maong gubat sa trapiko.
Nagkinahanglan siya ug mga aktibong traffic managers sa matag Local Government Unit sa tibuok probinsiya apil na sa mga fagkong dakbayan sama sa Mandaue, Lapulapu ug Cebu City.
Sama sa ubang motorista ug pasahero di ko suheto unsaon pagdumala ang trapiko.
Pero sa yano nakong pagsabot naglambigit ni ug numero nga nasandig sa kinaadman sa siyensiya sa engineering.
Gikan niining puntoha makaingon ta nga di mahimong matamatahon lang ang pagpatuman ug no right turn o no left turn sa usa ka eskina.
Labaw na kining karatula nga no entry nga sagad nimong mabasahan kung duna na’y dakong kalihukan nga pasiugdahan.
Sila nga maalamon sa natad sa trapiko mohatag ug konsiderasyon sa daghang butang nga mahimong makatampo sa kahuot o kahapsay sa dagan sa trapiko human sa lawom nga pagtoon. Kuhai lang ug basi ang mga bangga nga maoy sagad nga hinungdan sa pagkapalyar sa dagan sa trapiko.
Modagan pa ug pila ka minutos una mobalik ug kahapsay. Usahay maabtan pa ug oras.
Pinakapait kung moabot ug usa ka adlaw sama niadtong nahitabo sa ten wheeler nga trak nga nalimbuwad sa via duck sa South Road Properties. Ang maong hitabo naka apekto sa dagan sa komersiyo tungod kay daghang i-deliver nga produkto ang natanggong. Daghang negosyante nga may mga transaksiyon nga nabaraw. Daghang masakiton nga may appointment sa ilang mga doktor ug medical laboratory nga napurnada.
Daghan ang na-late o na-absent sa trabaho. Daghan ang nabiyaan sa giapas nga biyahe sa barko ug ayroplano.
Daghang tiyan nga gipangkutoy apil na ang mga sugo sa lawas nga giantos.
Layo ra kaayo ang SRP sa nahimutangan sa mga traffic managers sa mga ciudad ug kalungsoran.
Apan kung duna pa’y koordinasyon ang dali nilang mabuhat mao ang pagpahibalo sa mga motorista sa ilang tagsa tagsa ka area of ressponsability nga may dakong problema sa SRP aron makapangita ug laing ruta o iangan angan ba nila ang ilang biyahe.