ANG Korte Suprema sa India nideklarar nga unconstitutional ang ilang 158-anyos na nga balaod sa adultery nga nagsilot niini sa pagkabilanggo hangtod sa lima ka tuig. Ang buot ipasabot sa maong desisyon, di na krimen ang adultery sa India.
Dinhi sa ato, lab-as pa ang balita bahin sa usa ka minyo nga maestra nga gisikop sa kapulisan kay nasakpan uban sa iyang kabit sud sa usa ka lodging house didto sa San Remegio, Cebu. Nag-atubang sila sa kasong adultery ug concubinage.
Unsa man kining adultery? Ubos sa Article 333, Revided Penal Code (RPC), ang adultery mao ang pakighilawas tali sa usa ka babayeng minyo ug sa usa ka lalake nga di niya bana, ug ang maong lalake nasayod nga minyo ang maong babaye, bisan pa kon ang maong kaminyuon madeklarar nga nulo human sa maong pakighilawas. Ang matag pakighilawas iphon nga usa ka krimen nga adultery.
Unsa man kining concubinage? Ubos sa Article 334, RPC, ang krimen nga concubinage mahimo sa usa ka bana nga magpapuyo sa iyang kabit sa balay sa magtiayon o makighilawas sa iskandaluso nga paagi o makigpuyo sa iyang kabit sa laing lugar.
Ang adultery nahimo sa asawa. Kinahanglan nga ikiha siya uban sa gikahilawas nga lalake. Samtang ang concubinage nahimo sa bana. Kinahanglan nga ikiha siya ug ang iyang kabit.
Ang pruweba sa pakighilawas igo na sa pagkonbikto sa krimen nga adultery apan sa concubinage, kinahanglan nga probahon nga ang pakighilawas gihimo sa iskandaluso nga paagi, nga gipapuyo sa bana ang iyang kabit sa balay sa magtiayon o kaha nakigpuyo ang bana sa iyang kabit sa laing lugar.
Ang silot sa adultery prision correcional medium and maximum period kon pagkapriso gikan sa duha ka tuig, upat ka buwan ug usa ka adlaw ngadto sa unom ka tuig alang sa nakasala nga asawa ug sa iyang kabit.
Ang silot sa concubine o kabit sa kasong concubinage destierro, palayason ug mandoan pagpuyo sa distansya nga 25 kilometros gikan sa iyang gipuy-an kaniadto. Ang silot sa bana susama sa silot sa nakasala nga asawa sa kasong adultery.
Ang offended spouse mao lang ang makapasaka sa kasong adultery ug concubinage nga gilla nga mga pribadong krimen. Sa ato pa kinahanglan nga kasado pa silang duha sa pagpasaka sa kaso.
Di mahimong ang kabit ray ikiha sa adultery ug concubinage. Sa adultery, ilakip sa kiha ang asawa ug ang iyang kabit. Samtang sa concubinage, ilakip og kiha ang bana ug ang iyang kabit. Di ikapadayon ang kaso kon gipasaylo sa offended spouse ang kapikas nga nakasala o kaha nitugot siya sa pagpangabit sa iyang kapikas. - (edbarrita@gmail.com)