Mora na ta karon og usa ka mananagna. Makalingaw baya ni sila. Sama niadtong usa ka tawo nga gikawatan og motor nga nagpatagna. Matod pa sa managna, “Dong, sumala sa bolang kristal, ang imong motor tua na nagdagan sa Siquijor.” Tubag sa nagpatagna, “Modagan diay tong akong motor nga motor man to sa tubig.”
Usa ka tuig human siya moasumer sa katungdanan isip mayor sa Siyudad sa Sugbo, si Mayor Mike Rama mipagawas sa mga tumong sa iyang administrasyon. Lakip na niini mao ang paghuman sa pagtukod sa napulo ka andana nga Cebu City Medical Center (CCMC) sa di pa matapos ang iyang tulo ka tuig nga termino sa 2025.
Ang karaan nga CCMC building gi-demolish human kini maguba tungod sa linog niadtong Oktubre 2013. Gisugdan ang pagtukod sa bag-ong CCMC building niadtong Hulyo 4, 2014. Apan hangtod karon, siyam na ka tuig ang milabay, wa pa kini mahuman.
Nganong wa pa mahuman? Tulo pa lang ka andana ang gigamit. Ang uban nga mga kalihokan sa CCMC tua gibutang sa Bureau of Fire Protection (BFP). Tungod kay wa pa mahuman ang bag-ong CCMC building.
Gusto sa mayor nga ibalhin ang BFP. Gihinginlan na gani. Papahawaon na. Apan ang klaro mao nga way opisyal sa Cebu City Hall nga gitahasan sa pagdumala sa proyekto sa pagtukod sa bag-ong building sa CCMC.
Matod sa atong mga higala nga kontraktor, matag proyekto dunay gyuy project manager. Kinsa man kuno sa City Hall ang atong matumbok nga maoy nagdumala sa pagtukod sa bag-ong CCMC?
Lain pang hinungdan mao ang pag-usab-usab sa administrayon. Human sa duha ka termino, napulihan si Rama sa laing mayor. Ang maong mayor di gani gusto nga moabot sa napulo ka andana ang CCMC.
Busa, naundang ang pagtukod sa 10 ka andana nga CCMC building. Laing administrasyon, laing plano. Sa ato pa, way continuity. Ang gusto sa usa ka administrasyon mahimong di gusto sa mosunod nga administrasyon. Mao kini ang nakalahi sa usa ka local government unit.
Kinahanglan kining usbon arong dunay continuity sa usa ka proyekto. Wa magkuwang sa pundo ang lokal nga kagamhanan. Matod pa sa usa ka dumadapig sa Siyudad, sayop ang pag-ingon nga nabangkaruta ang siyudad. Karon nahibaw-an nga dunay mga depekto ang CCMC building. Kon duna pay project manager, dugay na unta kining nahibaw-an.