GIAWHAG ni Senador Nancy Binay ang Department of Information and Communications Technology (DICT) sa pagtangtang sa messaging app nga gigamit sa “Momo Challenge” nga gipasanginlang hinungdan sa kamatayon sa usa ka bata dinhi sa nasod ning bag-o lang.
Gipahinumdoman usab niya ang mga ginikanan sa pagbantay kon unsa ang mga apps ug websites nga gigamit sa ilang mga anak sa ilang mga gadgets. Mao sab ang Department of Education (DepEd).
Kinahanglan sab nga ipadayon ang “open communication lines” tali sa mga ginikanan ug sa ilang mga anak aron motug-an ang mga bata ngadto kanila kon sila di komportable, gihulga o di luwas.
***
Ang “Momo” girepresentahan sa makahadlok nga hulagway kansang mga mata morag nisudlot samtang ang lawas ug mga tiil morag langgam. Kinuha kini sa sculpture ni Keisuka Aisawa sa Link Factory, usa ka special effects company sa Japan.
Ang challenge naglakip sa messaging apps nga mohulga sa mga bata nga pabuhaton og mga bayolenteng buhat, pagdaot sa kaugalingon lakip na sa paghikog. Nagsugod ang Momo Challenge niadtong Hulyo sa miaging tuig apan kalit lang nga nahanaw.
Nitumaw kinig balik niadtong Pebrero kay gitaho sa website sa The Herald sa Scotland nga usa ka inahan sa Edinburgh niangkon nga gitionan siyag kutsilyo sa iyang liog sa iyang otso anyos nga anak kay gisugo sa usa ka tawo nga nigamit sa imahen sa Momo.
***
Daghan ang niingon nga di tinuod ang Momo Challenge. Apan kon tinuod man gani ug gigamit kini sa pagdaot sa kabataan, ang DepEd niingon nga di pasagdan ang tanang matang sa abuso, exploitation, discrimination, bullying ug pagdaot sa kabataan.
Mao nga angay ipadayon ang maayong relasyon sa mga ginikanan ug sa ilang mga anak aron sa mga higayon nga sama niini, ang mga anak mosumbong gilayon ngadto sa mga ginikanan.
Sa Internet anaa ang maayo ug daotan. Dali kining tinubdan sa inpormasyon, apan kalit lang sab nga mosulpot ang mga binuang.