INGON sa mag-una ang Lalawigan sa Sugbo sa pagkab-ot sa “new normal” bisan ubos pa kita sa Covid-19 pandemic kon atong panaminan ang mga lakang nga gibuhat ug giplanong pagabuhaton ni Cebu Governor Gwendolyn Garcia. Usa na niini ang paglibkas sa multa sa di pagsul-ob og face mask.
Ubos sa new normal, ang mga tawo di na mahadlok nga dakpon ug multahan kon mogawas sa ilang mga panimalay ug mobalik na sila sa ilang inadlaw nga mga kalihokan, apan magtuman gihapon sila sa mga health protocol sama sa physical distancing ug pagsul-ob og face mask.
Tungod sa Covid-19 pandemic, ang mga lokal nga kagamhanan nagpasar og mga ordinansa nga nagsilot sa makalapas sa curfew ug sa mga health protocol. Managlahing lokal nga kagamhanan, managlahi sab ang silot, gikan sa multa, pagkabilanggo ug community service.
Pananglit, ang ordinansa sa syudad sa Mandaue nga gipirmahan ni Mayor Jonas Cortes, usa ka Covid-19 survivor, niadtong Hulyo 2020, nagpahamtang sa multa nga P5,000 o pagkapriso gikan sa unom ngadto sa dose ka buwan sa makalapas sa health protocols, lakip na sa di pagsul-ob og face masks.
Samtang ang City Ordinance 2566 sa Siyudad sa Sugbo bahin niini nagpahamtang og administrative fine nga P500 sa unang pagkasikop, P1,000 sa ikaduhang higayon ug P3,000 sa ikatulo. Kon way ikabayad sa multa, hulipan kini sa community service. Ang mga violators patambungon og seminar sa health protocols.
Gusto ni Gobernador Gwen Garcia nga ilibkas ang silot sa di pagsul-ob og face mask. Apan wa kini magpasabot, matod niya, nga di na kinahanglang magsul-ob og face masks ang mga residente sa probinsiya. “This is not about telling people not to wear masks,” matod niya sa usa ka press conference sa Lunes, Abril 19, 2021.
Sanglit wa nay silot ang kapakyas sa pagsul-ob og face mask, kadtong way face mask di na dakpon sa kapulisan. Unsa may buhaton sa mga pulis? Kadtong makit-an nga way face mask, pahinumdoman sa pagsul-ob niini. Kadtong way face mask mga ikasul-ob, hatagan og face mask sa pulis.
Subay niini, si Garcia niingon nga ang Kapitolyo motugyan og balor P3 milyones nga facemask ngadto sa tanang 50 ka mga police station sa lalawigan sa Sugbo aron iapod-apod ngadto sa mga tawo ubanan sa pahinumdom mga isul-ob kini sa publiko aron malikay sa Covid-19.
Itugyan ang mga face mask nga gidonar sa Department of Social Welfare and Development (DSWD) ngadto sa kapulisan sa di pa malibkas ang silot. Ang memorandum nga maglibkas niini ipadala ngadto sa 44 ka mga lungsod ug unom ka component cities.
Way labot niini ang mga highly urbanized nga syudad sa Cebu, Lapu-Lapu ug Mandaue kansang mga opisyal namahayag nga magpadayon sila sa pagpatuman sa ilang mga ordinansa nga nagsilot niadtong di magsul-ob og mask.
Gipasalamatan usab ni Garcia sila si Police Brigadier General Ronnie Montejo, direktor sa Police Regional Office (PRO) 7, ug si Police Col. Engelbert Soriano, officer-in-charge sa Cebu Police Provincial Office sa pagpaluyo sa iyang lakang nga ilibkas ang silot sa di magsul-ob og mask. (edbarrita@gmail.com)