Sa matag tuig nga tanan, minilyon ka mga tawo gikan sa nagkalain-laing mga dapit ang mohugpa sa syudad sa Sugbo alang sa Sinulog grand parade nga ipahigayon sa ikatulong Dominggo sa Enero. Ang Sinulog nahimo nang labing dakong cultural event sa Pilipinas.
Ang pasundayag sa mga dance contingents sa Sinulog adto mosangko ug matapos sa Cebu City Sports Center (CCSC). Tungod sa Covid-19 pandemic, giplanohan nga balhinon kini gikan sa CCSC ngadto sa South Road Properties (SRP).
Manayaw gihapon ang mga contingents, apan wa nay audience ug ang ilang pasundayag ipakita na lang live sa telebisyon ug social media. Gitawag nila kini nga usa ka virtual Sinulog.
* * *
Apan niadtong Huwebes, Enero 7, 2021, nakahukom ang Cebu City Government ug ang mga opisyales sa Sinulog Foundation Inc. (SFI) nga kanselahon ang pagpahigayon sa Sinulog grand ritual didto sa SRP nunot sa rekomendasyon sa kapulisan ug ubang mga ahensiya sa gobyerno.
Ang pamahayag sa SFI ug ni Cebu City Vice Mayor Michael Rama nagkanayon, “Ang SFI ug mga nangulo alang sa kasaulogan sa Sinulog Festival, human sa makuti ug mainampingon nga pagtuki sa tanang mga kahigayunan ingon man sa pagsanong sa mga kabalaka sa atong mga kaigsuonang Sugbuanon nakahukom sa dili na pagpahigayon sa mga nahiunang gikatakda nga actual ug pisikal nga pagpahimutang sa sangka sa sayaw sa kadalanan, ingon man ang ritual nga pagpasundayag ngadto sa SRP.”
Sa laktod, kanselado ang Sinulog grand parade karong tuiga aron malikayan ang pagpundok sa mga tawo kay magtakod ug mosulbong unya ang mga kaso sa Covid-19 nga nikunhod na unta dinhi sa syudad sa Sugbo.
* * *
Unsa na man lang ang mahitabo sa Sinulog? Si Mike Rama, ang lead convenor sa Sinulog 2021, niingon nga ang sangka sa sayaw pagahimuon sa matag barangay, i-record ug hukman.
Ang mga recorded performances sa matag barangay isalida pinaagi sa Facebook pages sa kagamhanan sa syudad sa Sugbo ug sa SFI. Makit-an gihapon sa katawhan ang ilang mga sayaw pinaagi sa social media.
Agwanta lang una ta samtang wa pa kita mabakunahi batok sa Covid-19. Ang gobyerno nagplano nga mopalit og 148 milyones ka mga doses sa bakuna batok sa Covid-19 gikan sa pito ka mga vaccine manufacturers. Basin sa sunod tuig maka-Sinulog na ta.