Gipasar sa Cebu Provincial Board (PB) niadtong Abril 11, 2023 ang usa ka ordinansa subay sa lagda ni Cebu Gov. Gwendolyn Garcia sa pagdili sa culling o tinuyo nga pagpapatay sa mga himsog nga baboy aron paglikay sa pagkatap sa African swine fever (ASF).
Ang Provincial Ordinance 2023-02, nga gipangamahanan ni Cebu PB Member Victoria Corominas-Torribio (third district), nagdili sa culling sa mga baboy tungod sa hulga sa ASF nga gipatuman sa Bureau of Animal Industry (BAI), usa ka ahensiya ubos sa Department of Agriculture.
Si Gobernador Garcia nangusog nga ipasar ang Provincial Ordinance 2023-02 aron sa pagpahunong sa BAI sa pagpapatay sa mga baboy sud sa 500 metros o tunga sa kilometro nga gilay-on palibot sa lugar nga napalgan ang ASF, bisan kon himsog pa ang maong mga baboy.
Sumala sa maong ordinansa, kinahanglan nga ipahunong ang lagda sa BAI sa culling sa mga baboy aron sa pagprotehir sa kaayohan sa mga constituent sa lalawigan sa Sugbo. Kinahanglan sab nga ang BAI ug ubang mga ahensiya sa gobyerno nasyonal makig-coordinate sa mga local government unit sa pagkontrolar sa ASF.
Kon atong mahinumdoman, miabot sa 141 ka mga baboy nga himsog pa ang naigo sa culling sa siyudad sa Carcar sa miaging buwan subay sa mando sa BAI. Kon wa pa kini ipahunong ni Governor Garcia, duna pay laing kapin sa 500 ka mga baboy ang maigo sa culling.
Ang mosupak sa ordinansa multahan og di molabaw sa P5,000 o pagkapriso sa di mosobra sa usa ka tuig, agad sa desisyon sa hukmanan. Giawhag usab ang mga LGUs ug kapulisan ubos sa hurisdiksiyon sa gobyerno sa lalawigan sa Sugbo sa pagpatuman niini.
Lakip niini ang pagpatuman sa mga checkpoint ug ubang biosecurity and control measures batok sa ASF. Ang maong ordinansa nagmando usab sa pagmugna sa mga Barangay African Swine Fever Task Force sa matag LGU sa lalawigan sa Sugbo.
Ang Barangay African Swine Fever Task Force pangulohan sa barangay kapitan, usa ka barangay konsehal isip vice chairman ug mga purok leaders isip mga sakop.
Sa unahan, gipasar sa Cebu Provincial Board ang usa ka ordinansa nga magsilot sa national agencies ug mga government-owned and controlled corporations nga di mokonsulta sa Kapitolyo ug sa ubang mga LGU sa pagpatuman sa ilang mga programa ug proyekto dinhi sa lalawigan sa Sugbo.
Ang maong ordinansa nagpahamtang usab og multa nga P5,000 matag kalapasan o pagkabilanggo sa di molabaw sa usa ka tuig, gawas sa pagpasaka og mga kasong administratibo tungod sa pag-abuso sa gahom ug katungdanan. (edbarrita@gmail.com)