Barrita: PCSO pabayron sa lotto winner bisan naplantsa ang ticket

Human sa siyam ka tuig nga kumbati sa korte, midaog sa legal battle ang usa ka tawo nga midaug sa 6/42 lotto draw apan wa bayri sa Phi­lippine Charity Sweepstakes Office (PCSO) kay naitom ang bahin sa iyang winning ticket tungod kay giplantsa.

Sa kaso nga PCSO v. Mendoza (G.R. No. 257849, March 13, 2023), gimandoan sa Labaw’ng Hukmanan ang PCSO nga bayran si Antonio F. Mendoza sa iyang daog sa 6/42 lotto draw nga P12,391,600. Ang 17 ka pahina nga desisyon sinuwat ni Associate Justice Jhosep Y. Lopez sa Second Division sa Korte Suprema.

Ang desisyon nagsalindot sa petition for review on certiorari nga gipasaka sa PCSO batok sa desisyon ug resolus­yon sa Court of Appeals (CA) nga nagdason sa desisyon sa Regional Trial Court (RTC) sa Balayan, Batangas sa Civil Case No. 5353 nga nagmando sa PCSO nga bayran si Mendoza og P12,391,600 nga jackpot prize sa Lotto 6/42.

Niadtong Oktubre 2, 2014, si Mendoza nipusta og tulo ka “lucky pick” sa Lotto 6/42 draw sa usa ka lotto outlet sa Batangas. Pagkasunod buntag, nahibaw-an niya nga usa sa iyang tulo ka “lucky pick” number combinations nidaog. Apan nakumot sa iyang apo ang maong ticket.

Sa paningkamot sa anak ni Mendoza nga ma-flat og balik ang ticket, iya kining giplantsa nga gipaibabwan og panapton. Ang resulta, niitom ang bahin sa ticket. Ang maklaro na lang mao ang unang duha ka digits, ang outlet nga gipa­litan sa ticket, draw date, date of purchase ug kabahin sa takna sa pagpalit sa ticket.

Pagka Oktubre 5, 2014, gi­presentar ni Mendoza ang iyang ticket sa PCSO sa Mandaluyong City. Giingnan siya nga ipasuwat sa kinamot ug isaysay ang nahitabo. Gituman niya kini ug gisumitir niya pagka Oktubre 7 ang iyang affidavit sa Legal Department sa PCSO.

Apan sa usa ka suwat nga penetsahan og Oktubre 20, 2014 letter, gipahibawo si Mendoza sa PCSO nga di nila mahatag ang jackpot prize kay nadaot ang ticket ug di ma-validate. Sa kasamtangan, ang estorya ni Mendoza miabot sa House of Representatives Committee on Games and Amusements.

Ang maong komitiba, pinaagi sa Committee Report No. 717, mirekomendar nga ihatag ngadto kang Mendoza ang iyang daog kay ang mga sirkumstansiya ug ebidensiya nagtumbok nga si Mendoza mao ang tag-iya sa winning ticket.

Nibalik si Mendoza sa PCSO aron maningil sa iyang daog sa Oktubre 2, 2014 nga Lotto 6/42 draw apan wa na siya tagda. Mipasaka siya og kaso nga specific performance sa RTC. Daog si Mendoza sa RTC. Daog sab siya sa Court of Appeals. Miapelar ang PCSO sa Korte Suprema.

Gitan-aw sa Korte Suprema ang duha ka habig. Ang PCSO miingon nga ang condition precedent sa paghatag sa daog mao ang pagpresentar sa “complete physical ticket.” Samtang si Mendoza ug ang House of Representatives Committee on Games niingon nga ang condition precedent mao ang pagpili sa “winning number combination.”

Matod sa Korte Suprema, ang Article I sa PCSO Rules, wa maghisgot og “winning ticket.” Ang ticket pruweba lang nga ang nipusta nipili sa “winning ticket combination.” Ug naestablisar nga si Mendoza nipusta sa winning numbers. (edbarrita@gmail.com)