Nag-estoryahay ang duha ka kumpare. Pare 1: Pre, kinahanglan na gyud ka’g baga nga kurtina kay bildo ang imong bongbong. Kagabii, klaro kaayo nga nagdu’g mo ni kumare.” Pare 2: ”Dautan na gyud ka’g mata pre. Ngano gud tawon nga magdu’g mi ni kumare nimo nga wa man ko mouli gabii?”
Daghang mga tawo ang nag-awhag og transparency ug accountability sa gobiyerno, sa mas dayag nga mga transaksiyon aron kalikayan ang mga anomaliya ug pangurakot nga maoy naka-ut-ot sa panudlanan sa gobiyerno. Lakip na niini ang bidding process, sa pagsubasta sa mga kontrata sa gobiyerno.
Gipasar sa konseho sa siyudad sa Sugbo niadtong Agusto 16 ning tuiga ang City Ordinance No. 2703, series of 2023, nga mag-institutionalize sa live-streaming sa bidding process sa bids and awards committee sa kagamhanan sa dakbayan. Kini gipangamahanan ni Konsehal Rey Gealon, usa ka abogado ug kanhi magsisibya.
Apan gi-veto ni Cebu City Mayor Michael Rama ang maong ordinansa, ang gitawag nga “Live Streaming of the Bidding Process of the Bids and Awards Committee (BAC) of the City of Cebu,” tungod kay nakalapas kini sa pipila ka mga balaod.
Ubos niini, ang tibuok bidding process, lakip sa pre-procurement conference, pre-bid conference ug hangtod sa pag-abli na sa mga bids, ipakita live gikan sa pagsugod hangtod nga matapos sa mga social media platforms sa Kagamhanan sa Siyudad sama sa YouTube ug Facebook ug sa official website sa Siyudad.
Sa iyang suwat ngadto sa Konseho nga penetsahan og Septiyembre 5, 2023, si Rama miingon nga ang maong ordinansa nakalapas sa Data Privacy Act of 2012 (Republic Act No. 10173), mo-supersede o mohulip sa Implementing Rules and Regulations (IRR) of the Government Procurement Reform Act (RA No. 9184) ug magkompromiso sa “general welfare clause” sa Local Government Code.
Nganong makalapas man sa Data Privacy Act? Matod pa ni Rama makalapas kini sa right to privacy sa mga bidders kay basahon man ang ilang mga personal ug sensitibong impormasyon atol sa bidding. Wa usab ilatid ang live streaming sa mga bidding ubos sa Government Procurement Act. Kon wa sa nasudnong balaod, di kini mahimong rikisito sa usa ka lokal nga ordinansa.
Atong tukion kining general welfare clause, alang sa kaayohan sa tanan. Mao kini ang gibasihan ni Mayor Rama sa iyang pag-veto sa maong ordinansa alang, matod niya, “to preserve the comfort and convenience” sa iyang mga konstituwente.
Apan si Konsehal Gealon, ang chairman sa committee on laws sa Konseho, miingon nga ang samang general welfare clause mao ang iyang gisandigan sa pagpasar sa maong ordinansa aron ipatigbabaw ang “primordial right of the people to know.”
Sa sesyon sa Konseho niadtong Miyerkules, Septiyembre 13, miingon lang kini nga “noted” ang veto ni Mayor Rama sa maong ordinansa. Si Konsehal Gealon miingon nga ang maong veto ni Rama maoy nagpatay sa ordinansa. Sa panagsangka sa transparency ug right to privacy, isa ang kamot sa right to privacy. (edbarrita@gmail.com)