Barrita: Unang hari sa karsada nabiyaan

Barrita:  Unang hari sa karsada nabiyaan

Ang mga tartanilya maoy giila nga unang “hari sa karsada” apan napulihan sa maong puwesto sa mga jeepney nga hayan mapulihan na sab sa mga modern jeep ubos sa transportation modernization program sa gobyerno.

Daghan kaayong mga tartanilya nga nagdagan sa siyudad sa Sugbo sa unang panahon mao nga ang kadalanan napuno sa hugaw sa kabayo nga nagguyod sa tartanilya. Sa kadugayan, gipabutangan na ang mga tartanilya og sawod sa hugaw sa kabayo.

Tungod sa ilang kadaghan kaniadto, di kalikayan nga dunay mabanggaan sa tartanilya, hinungdan sa kahasol sa usa ka imbestigador kon unsay Iningles sa tartanilya. Sa katapusan mao kini ang iyang gisulat sa blotter, “The victim was hit by a one horse-powered vehicle.”

Si Cebu City Councilor Pastor “Jun” Alcover Jr. namahayag nga nabiyaan sa kagamhanan sa siyudad sa Sugbo ang mga tartanilya ug ang mga kutsero. Dihay pasiaw sa usa ka pasahero nga misakay og tartanilya. Kutsero: “Ikaw ray mosakay, Dong?” Pasahero: “Ikaw diay, Noy, manaog diay ka?”

Balik ta ni Konsehal Jun Alcover. Niproponer siya og usa ka ordinansa alang sa mga kutsero. Naglakip kini sa libre nga checkup ug medisina sa ilang mga kabayo kausa sa matag unom ka buwan ug pagbutang og rota sa mga tartanilya sa heritage sites sa siyudad kay ang mga tartanilya tipik ug kabahin sa kasaysayan sa Sugbo.

Ubos sa gisugyot nga ordinansa ni Alcover, P200 ang pleti kada oras sa tartanilya sa tourist package o P50 matag tawo gikan sa point of origin padung sa tourist o heritage site. Samtang ang minimum rate P10 kada pasahero.

Maayo kay nakahinumdom si Konsehal Alcover sa mga tartanilya ug sa mga kutsero. Kaniadto piso ray pleti. Sa dihang niumento kini, ang pasiaw mao nga tungod ni kay niumento sab ang presyo sa “grassolina,” sa kumpay sa kabayo.

Nakahinumdom ko sa kantang “Kaming mga Paradista.” Matod niini, “Kabus ug timawa sa mata sa katilingban/ Sa kapait nakiglimbasog ni’ning lawod sa kalisdanan/ Init ug ulan, abog kakapoy giagwanta ang tanan/ Bugtong tinguha kamo kaalagaran...”

“Pobreng kutsero ang tawag nila kanamo/ Panginabuhi uban sa buotang kabayo/ Singot ug kusog maoy puhunan niining kinabuhi/ Among kawad-on maoy bugtong bahandi...” Mokabat na lang sa 100 ka mga tartanilya ang nagdagan sa siyudad sa Sugbo. Duna pa kahay gustong magkutsero?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph