Subo kaayo’ng palandungon nga halos kada buwan duna koy klasmet, kauban sa trabahoan, kaila, o higala nga naigo ining makamatay nga cancer, labi na kadtong wa magdugay kay uwahi nang nahibaw-an, mitakod na sa ubang parti sa lawas ang cancer cells ug nipahuway na sa dayon.
Karong buwan sa Oktubre atong gisaulog ang ‘Pink October’ kun ‘Breast Cancer Awareness Month’ sa tibuok kalibutan nga nagtuki mahitungod sa breast cancer maong ang akong mga lindog karong buwana mahitungod ini.
Ako’ng unang hisgutan mga timailhan o simtomas kon naay abnormal nga mitubo nga cancer cells sa suso labi na kon hapit na mag menopause o nag menopause na o dunay kaliwat nga namatay sa susama ining sakita.
Dako og matabang ang pag-ila sa mga warning sign kay duna na may mga paagi ug tambal nga mobatok ini sama sa hormone therapy, gene testing ug HER2 targetted nga therapy.
Unsa may mga warning signs ini?
Matod sa Liveforfun nga artikulo, ang labing unang simtomas ang lumps o bugol-bugol sa suso. Kasagaran ini gahi o medyo rubbery unya way mabating sakit inig hilam.
Ayaw kahadlok kay di tanang bugol-bugol cancerous. Dunay uban nga kumon ra nga cysts unya kasagaran ini benign o fibroadenomas nga di cancerous.
Laing simtomas ang pagdako o hubag sa suso. Ang uban ini posibling sa ilawom o sulod sa suso naay nanago nga lumps. Kon kini mahitabo, mo bug-at ang suso unya mausab sab iyang porma ug gidak-on.
Sunod kining discharges nga miguwa sa atngal (di gatas) tubigon usahay dunay sagol nga lasaw nga dugo. Posibli sab nga duna ray impeksyon ang suso o nakasinati og hormonal changes.
Pagbantay sab sa inverted nipple. Imbis naa sa gawas ang atngal, na lupyak na hinuon. Kon kalit kining nausab sa iyang naandang hitsura, angay kini’ng ipa-check up gilayon.
Katapusan ang pagkandiis sa panit sa suso unya ang hitsura murag color sa orange nga prutas.
Sunod Sabado ato na sang tukion ang mga angay buhaton o remedyo para sayong matabangan, maagapan ug matambalan ang pasyente.