Kitang tanan makasinati og ka stress matag karon ug unya kay wa man kiniy pillion kon kinsa o kanus-a ka maigo bisag ma dato o pobre, ma bata o edaran, himsog o masakiton.
Diay akong ikatampo nga mga sugyot kon unsay angay buhaton kon ma depressed aron di kaayo maigo unya makabangon pagbalik sa naandang gimbuhaton.
Suwayi og kaligo gamit ang init-init nga tubig imbis bugnaw kay ang init makatabang pag pa-relax sa imong kaunuran ug kaugatan.
Human, pagsul-ob og presko, humot ug komportabli nga sapot (underwear, pajama, o daster) nga hayahay pangkatulog. Pwede sab mamutang og humot nga lotion o powder (bisag unsang klaseha ma mahalon, baratuhon, scented o ununscented sama sa lavender nga maka relax sa imong panghuna-huna ug lawas.
Suwayi og inom og tsa (tea) nga makasayon og patulog sama sa Chamomile tea kay kini garantisado nga makatabang og patulog.
Paminaw og sonata nga makatabang pa kalma sama sa SPA music, jazz, instrumental basta di lang saba ug alingog-ngog kay kini makasakit sa dunggan ug dughan labi na kon magbuto-buto kini sa speaker.
Panawag og higala nga komportabli ka makig-etorya. Ayaw ng mga tipong marites kay libakon ra ka ana kon adto ka magpahungaw, pun-an o kuhaan pa gayod ang estorya maong mosamot na hinuon ka depressed.
Buhata ang imong mga gimbuhaton nga dugay nang na parking sama sa pagduwa sa imong paboritong pets, ma iro o iring. Pwede sab nga isuwat imong gibati pinaagi sa diary o ba kaha makig sing-a-long sa imong paboritong singer.
Kon duna kay makuyugan nga kasaligan nga parehas nimo og hilig, kuyog o uban nila pagbakasyon, makig jamming, disco, o ballroom dancing o ba kaha suroy sa mga lugar nga wa pa nimo maabti.
Suwayi sab ang mag-walking o jogging. Gawas nga maka ehersiyo, makahanggap pa og preskong hangin.
Katapusan nakong sugyot mao ang tim-os nga pag-ampo sa nagbuhat nato nga labing gamhanan. Gawas nga makapahungaw ka sa imong mga kasakit, kaguol, kahiubos ug kahingawa nga way paghusga, maka kukabildo ka pa Niya bisag asa ug kanus-a.