GOOD news kaayo ang mga numero sa mga kaso sa Covid-19 nga mapatik sa mga mantalaan ug madunggan sa mga balita sa TV ug radyo sa Cebu kay miubos na ang gidaghanon sa mga kaso. Misulbong lang to og kalit og duha ka buwan kapin tungod sa Delta variant. Apan pareho sa first ug second wave, anam-anam ra sab nga nagkagamay human sa makalilisang nga pagpanakod. Diha pay higayon nga niabot og 400 ang usa ka adlaw sa gidaghanon sa mga natakdan.
Di pa karon angay nga ikompyansa kay matod sa mga health expert, posibleng motumaw pa ang mas isog nga variant. Kanang mas isog ug mas mananakod pa sa Delta, labina kay daghan pa ang wa magpabakuna. Bisan gani kon daghan na ang nabakunahan, di gihapon angay nga kompyansahan hangtod nga ang katapusang tawo matusokan. Suma sa nahitabo karon sa Singapore, bisan taas ang porsyento sa mga tawo nga nabakunahan, nibalik og panaghan ang ilang mga kaso. Nibalik na sab sila sa uno.
Matod man gud sa mga eksperto nga di mobiya ang kagaw sa Covid-19 hangtod nga ang tanang mga tawo matakdan. Nagpasabot nga anha na mohunong ang kagaw kon ang tanang mga tawo duna nay immunity sa kagaw, tungod sa bakuna ug ni-survive sa sakit. Ang tawo nga nabakunahan ug natakdan unya ni survive, mas maayo og immunity.
Kon tan-awon ang porsyento sa nangamatay sa nangatakdan sa Covid, ubos gihapon kaayo, Nipasabot usab ang mga health expert nga ang mga lumolupyo sa mga dapit nga ubos kaayo og kaso sa Covid kuyaw pa nga maigo og maayo sa umaabot nga mga buwan itandi niadtong mga dapit nga nakasinati og grabeng surge.
Sakto baya si Gobernador Gwendolyn Garcia ug ubang lokal nga mga opisyal nga angay nga balansehon ang ekonomiya ug Covid response. Tinuod, nalibre sa Covid, apan ari usab mamatay sa tumang kagutom kay liboan ang nawagtangan sa ilang panginabuhian.
Sayon ra kaayo sultihon sa ubang wa mawagtangi og trabaho nga kinahanglan nga pig-utan ang paglihok sa tawo. Di baya lalim kon duna kay pamilyang gibuhi, ug unya ikaw kakha tuka ang matang sa panginabuhi.