Binasi sa Ezekiel 33:7-9; Salmo 95; Taga-Roma 13:8-10; Mateo 18:15-20
MANGGIULAWON ko sa bata pa ko. Bisan gani karon. Hinumdom pa ko niadtong grade 4 pa ko ug mao pay pagsugod sa klase. Nasaag ko sa unang adlaw. Sa dihang nakaabot na ko ang among lawak-tun-anan, misulod ako ug didto na ang klase ug ang among titser. Alegrehon si Mam ug iya kong gipasulod. Naa lang siyay nasulti nga nakapasaka sa akong pagka-“self-conscious”, nga morag gibati nako nga ang tanan nagtan-aw kanako.
Tandugonon kaayo ang tawo. Ug kitang mga taga-Asia, molikay gyod kita nga mapaulawan sa publiko. Mao nga kon tawgon kitag “bagag nawong” dako kini nga insulto kay daw dili na kita madutlan ug dili na matudloan.
Gitudloan kita sa ebanghelyo kon unsaon nato pagtratar sa usa ka igsoon nga nagpakasala. Gihan-ay ang mga lakang – istoryahi usa nga kamo lamang duha; kon walay kabag-ohan, pangita og duha or tulo ka saksi; paatubanga sa inyong gagmayng Kristohanong katilingban; ug kon wala pa kini epekto, ayaw na siyag isipa nga sakop.
Nag-ila ang proseso sa pagkabililhon sa mga tawo nga nahilakip sa usa ka panagbangi. Ang tawo nga nakapasakit o nakasala ug ang tawo nga nasakitan o nahitungdan sa sala, silang duha may dignidad nga kinahanglan tahuron. Lahi ni sa pamaagi sa daghan kanato sa kasamtangang panahon. Kon adunay walay pagsinabtanay, ipalanog dayon sa “social media” ug maglisod na og pagsinabtanay kay nakahibalo na tanan nga mobasa sa “social media”, dili lamang tulo ka tawo o ang gamayng katilingban.
Apan may lain pang rason kon nganong mas maayo gyod nga agian ang proseso. Sumala sa ebanghelyo, “Kon duha kaninyo dinhi sa yuta nagkauyon pagpangayo og bisan unsa, pagahimuon kini alang kanila sa akong Amahan nga atoa sa mga langit”. Kini diayng panaghiusa, nga karon ug unya masamad tungod sa panagbingkil, kinahanglan mahiuli alang sa atong pagkamabungahon diha sa pag-ampo.
Ang labing lalom nga motibasyon kon nganong adunay proseso sa paghatag og koreksyon nga inigsuon mao nga may tulobagon ang tawo sa iyang kaugalingon ug aduna tulobagon kita sa usag-usa. Mao kini ang gipatin-aw ni propeta Ezekiel. Ang ngil-ad nga tawo nga gipahimangnoan ug maghinulsol, maluwas. Ang gipahimangnoan nga dili magbag-o, malaglag.
Apan ang pagpahimangno kinahanglan paluyohan og gugma kay, sumala pa sa sulat ngadto sa mga taga-Roma, ang gugma maoy motuman sa balaod. Dili diay paigo nga kasuko lamang mahitungod sa usa ka inhustisya mao nagpaluyo sa pagpakig-istorya sa hingtungdan, kinahanglan pod tinukmod ang atong pagpakig-istorya kaniya sa gugma nga gikan sa Dios.
Kon puy-an lamang nato ang maong proseso nga atong nahisgotan ug ubanan kini og gugma, daghan tingaling mga problema sa banay ug sa katilingban ang malikayan. Daghang mga pundok nga magpabiling usa ug wala magkawatakwatak.
Nakasuway na ba ikaw og himo niining proseso nga gihisgotan ni Jesus?