Binasi sa: Amos 7:12-15; Salmo 85; Taga Efeso 1:3-14; Marcos 6:7-13
KANIADTO makakita na gani kog sungkod, tigulang o masakiton dayon ang mosulod sa akong ulo. Ang akong lolo, amahan sa akong inahan, may sungkod man god. Tabang ang sungkod sa mga tuhod o paa nga huyang o dunay nakaapan. Apan dili lang ni pangtiguwang. Gani ang mga motungas o molugsong sa hanayhay o habog nga bukid, nanginahanglan og sungkod. Apil na ang mga mohimo og relihiyosong panaw. Ang sungkod simbolo sa pagsalig. Gitugyan niini sa mga mosungkod ang ilang kinabuhi.
Gipaambit ni Jesus ang Napulog-duha sa iyang misyon. Apan usa niya sila gipadala, gipangandaman usa niya sila. Pinaagi kini sa pagtudlo ginamit ang sambingay, mga panultihon, ug pagsangyaw sa maayong balita. Gipakita usab niya kanila ang pagpuyo nga yano ug pagbuhat og mga katingalahang buhat. Sa dihang iya na sila gipadala, "gipanghimangnoan niya sila sa dili pagdala bisan unsa sa ilang panaw gawas sa sungkod lamang, ni pan, ni puntil, ni salapi diha sa ilang bakos...magsul-ob og sandalyas ug dili magsul-obog duha ka kupo."
Sungkod ug sandalyas. Simbolo sa pagsalig panahon sa panaw. Salig lamang sa Dios nga maoy mopanaw uban kanila. Ang Dios maoy mohatag kanila panabang sa lugar nga ilang adtoan: "Sa bisan asang balay kamo mosulod, pabilin kamo didto hangtod mobiya kamo niadtong dapita." May mga kaabag diay nga ipatumaw sa Dios nga motabang sa iyang mga kaabag sa misyon. Tinuod, inaton ta labang sa atong mga naandan, apan dili sad ta biyaan sa Dios.
Gipakagiw si propeta Amos gawas sa Israel kay mipamulong man siya batok sa hari. Gipadayag niya kon unsang matang ang iyang sungkod: nga usa siya ka magbalantay sa karnero ug tiggalam og tanom apan ang Ginoo maoy naghatag niyang misyon isip propeta. Ang Ginoo maoy iyang sungkod.
Diha sa sulat ngadto sa mga taga Efeso, Dios gihapon ang sungkod. Siya ang nagtawag sa mga Kristohanon sa wala pa mugnaa ang kalibutan. Gigasahan niya sila sa tanang espirituhanong panalangin diha sa kalangitan aron santoson sila ug himuong walay buling. Diha kang Jesus isumada ang tanan ug himuong tibuok pag-usab. Grabe nga sungkod ni.
Atubangan sa tanang kalisdanan nga ato karong gisagubang isip usa ka nasud, magpabilin kita nga malaumon, matuohon, ug mahigugmaon kay ang Ginoo maoy atong Sungkod.
