Binasi sa Job 7:1-4, 6-7; Salmo 147; 1 Taga-Corinto 9:16-19, 22-23; Marcos 1:29-39
ANG pulong "waiter" gikan sa "wait" kun paghulat. Ang usa ka "waiter" nagahulat sa mga mangaon sa usa ka kan-anan aron mahibaloan ug masilbihan sila sa ilang mga panginahanglan. Ang usa ka maayo nga "waiter" listo ug batid. Maantigo siyang maniid o mangutana aron mahibaloan kon unsay orderon nga pagkaon ug uban pang mga detalye sa pagsilbe. Ang maayo nga "waiter" maoy mohulat sa "customer" dili ang "customer" maoy mohulat sa "waiter". Dili mahimong balihon ang papel sa duha.
Giayo ni Jesus ang ugangang babaye ni Simon nga naghigda nga gihilantan. "Ug miduol siya, gikuptan niya ang iyang kamot ug gipabangon, ug mibiya ang hilanat kaniya, ug mialagad siya kanila," nagkanayon ang ebanghelyo ni Marcos. Ang pagpangalagad diay timailhan ug bunga sa pagkaayo sa usa ka tawo. Natural ang pagpangalagad isip pagbalos sa tawo nga mapasalamaton. Gikan didto sa balay ni Simon "gidala nila ngadto kaniya ang tanan nga adunay mga sakit ug ang mga giyawaan", midugang si Marcos. Nagpadayon pod og pagsilbi si Jesus. "Waiter" pod diay si Jesus ug gitawag kita nga mapareho pod niya.
Kinahanglan ang pagka-"waiter" nato sa usag-usa dawaton sa maayo ug malipayon nga kabubut-on. Kondili gani morag "pinugos nga pag-alagad", sumala pa sa libro ni Job. Laay kini ug mora lang og ulipon "nga nangandoy sa iyang suhol". Makadani si Jesus kay ang iyang pagka-"waiter" puno sa kalipay.
Isip Kristohanon, ang atong pagka-"waiter" mao ang atong pagsangyaw sa maayong balita. Gani si San Pablo nagkanayon nga: "Wala akoy katungod sa pagpasigarbo tungod lamang kay nagwali ako sa ebanghelyo, sanglit gisugo man ako pagbuhat niini. Alaot ako kon wala pa ako magwali sa ebanghelyo!" Ug tungod sa maong misyon sa pagsangyaw sa maayong balita, nagpahiuyon sa tanang tawo si Pablo aron maluwas niya ang pipila kanila. "Waiter" pod diay si San Pablo nga maantigong mobagaybagay sa tanang tawo tungod ug alang sa ilang kaluwasan.
"Waiter" ba usab ang atong kinaiya diha sa atong pagpangalagad sa simbahan ug sa katilingban?