Usa sa mga gihimong instrumento panahon sa kampanya aron pagguba, pagpakaulaw ug pagbiaybiay sa pagkatawo sa kaatbang sa politika mao ang gitawag og mga trolls, o kadtong mga tawo nga mogamit sa mga alias ug bisan unsa nga paagi aron dili mailhan ang tinuod nga pagka-tawo apan libre nga modaot ni bisan kinsa nga ilang gusto.
Hilabihan makabunal ug manamastamas kay ubos man sa pagtuo nga dili sila mailhan og kay dili mailhan, dili makiha sa kaso nga cyber-libel. Tungod niini, daghan ang naka-kwarta kay gihimong trabaho ang pagpangatake sa kakontra pinaagi sa Facebook. Luoy ang giatake kay dili makabalos sanglit dili man niya mailhan ang troll.
Diha pod mga higayon nga gigamit ang Messenger pagpangilad sa katawhan nga niresulta sa pag-pagawas sa kwarta. Adunay mensahi nga madawat nga kunohay nagkinahanglan og kwarta ang usa ka amigo kay adunay emergency ug tungod niini, nailad gyod og pipila ka libo ka pesos.
Ngano man kini?
Tungod kay sayon ra kaayo ang pagpalit ug pag-gamit sa Subscriber Identity Module o SIM nga maoy gamiton para maka-text o maka-tawag ug maka-abri og Facebook ug Messenger account.
Mahimo pod gamiton ang maong SIM alang sa Viber, Twitter, Snapchat ug uban pa.
Barato ug dali ra kaayo ang pagpalit ug pagpuli sa SIM sa gamiton sa usa ka tawo, nga maoy nahimong hinungdan nga sayon ra kaayo sa mga trolls ang pagpangatake ni bisan kinsa.
Apan karon nga adunay balaod nga nagmando nga irehistro na ang tanang mga SIM cards, mamahimong mausab na ang dagan sa pag-gamit sa social media sama sa Facebook, Twitter o Viber.
Pinaagi sa maong mando sa pagrehistro, mailhan na kon kinsa ang tag-iya sa usa ka SIM.Labaw sa tanan, wala nay higayon nga makagamit og alias ang tag-iya sa SIM card. Kadtong mahilig mangatake sa tago pinaagi sa paggamit og alias, wala nay luna sa social media karon. Mao kini nakanindot sa SIM Registration Act.
Makatabang usab kini sa pagsumpo sa mga krimen gamit ang cell phone tungod kay mailhan na man ang tag-iya sa SIM. Sa mga tawo nga ligdong ug walay plano nga magbinuang o magpabadlong gamit ang cell phone, angay o husto ba nga mahadlok sa maong balaod?
Walay angay kahadlokan sa maong balaod. Sama lang kini sa balaod nga national ID system nga gibatikos kanhi kay nakalapas kuno sa tawhanong katungod.