NINDOT paminawon ang mga reaksiyon sa mga katawhan sa balita nga dunay ipagawas nga listahan sa mga tawo nga naapil sa negosyo sa ginadiling druga.
Drug Matrix, matod pa.
Kining maong lista, sumala sa balita, naglambigit sa pipila ka mga politiko nga kasamtangan nga naglingkod sa pangatungdanan og ang uban, kasamtangan sab nga mga kandidato sa umaabot nga piniliay karong bulan sa Mayo.
Thrilling, matod pa, tungod kay mahibaw-an na gyod kon kinsa kining maong mga tawo nga naapil sa maong Drug Matrix.
Dili na ikalimod pa nga kon maapil sa maong lista ang usa ka kandidato, segurado gyod nga tigbak na ang iyang kahigayonan nga modaog sa umaabot piniliay.
* * *
Buyno, daghan ang nagduda sa mga nalista sa maong Drug Matrix.
Ngano man?
Tungod kay ilado na kining mga tawhana nga maoy kugihan manalipod kon dunay madakpan. Kini sila mao dayon ang tawagan sa nga nadakpan aron motabang nga dili sila masulod sa prisohan.
Nga dili man unta sila mga abogado.
Kini sila ang kugihan kaayo mosulti sa PDEA o kapolisan nga “asset” ang mga nadakpan sa kagamhanan og dili angay nga hilabtan sila sa ilang sekreto nga operasyon.
Ang uban nga mahadlok, dali dali sab nga mobuhi sa maong mga dinakpan.
Pero ang uban nga mga tarong, dali ra sab makabalibad.
* * *
Ang nakasamot kabibo niini kay ang uban nga gidudahan nga naapil sa maong Drug Matrix kay kugihan kaayo sa pagbalibad nga wala silay labot.
Gani, mosulti pa nga na-cleared na sila sa PDEA, NBI og sa kapolisan.
Ang pangutana sa mga nagduda, kon na-cleared man gani, nganong naapil pa man sa Drug Matrix?
* * *
Pero dunay misupak sa maong Drug Matrix.
Supak sila nga ibulgar sa publiko ang maong Drug Matrix.
Ngano man?
Kadudahan ang katuyoan sa maong Drug Matrix. Nganong karon ra man ibulgar ang maong listahan nga padung ang piniliay. Nganong wala man kini buhata sa una?
Demolition job ba kini alang sa oposisyon?
Ikaduha, nganong dunay listahan?
Para asa man kini?
Kon dunay kalambigitan ang usa ka tawo sa ginadiling druga, nganong ilista man lang? Nganong dili man sila kasohan aron mahatagan usab sila og kahigayonan nga manalipod sa ilang mga pangalan?
Ikatulo, kon tinuod nga nahilambigit ang usa ka tawo sa druga, unsa may rason nga ibulgar ang ilang mga pangalan?
Aron pakaulawan ang mga nalista?
Mas importante ba ang pagpakaulaw kay sa pag-file og kaso ngadto sa korte?
* * *
Ang nakanindot pa gyod kay dunay pipila ka mga LGU nga nag-imbento og usa ka paagi sa pagsumpo sa pagkatap sa druga.
Unsa man kini?
Giadto nila ang kabalayan sa mga gidudahang nalambigit og ilang gihinabi bahin sa ilang mga plano.
Human niini, gipapilit nila ang usa ka sticker nga nagpahibalo nga “drug-free” ang maong balay.
Kon ibulgar na ang maong Drug Matrix unya dunay naapil sa maong panimalay, unsa kahay ikasulti sa maong mga LGU?
Moryo-moryo lang ang ilang gibuhat?
* * *
Angayan ba nga ibalaod ang pagdisiplina sa mga kabataan?
Nawad-an na ba og pagsalig ang kagamhanan sa mga ginikanan mahitungod sa isyo sa disiplina?
Duna bay nakitang kasaypanan ang kagamhanan sa mga ginikanan sa pagdisiplina sa ilang mga anak?
Makadaot ba sa kaugmaon sa mga bata ang gitawag og “corporal punishment” nga naglambigit sa usa ka ginikanan nga gustong disiplinahon ang iyang anak?
Husto ba ang gihimo sa mga kabataan sa Estados Unidos nga i-report ang ilang ginikanan sa 911 kon kasab-an o hulgaon sila?
Mas importante ba ang katungod sa mga bata kay sa katungod sa mga ginikanan sa pagdisiplina kanila?