Ngil-ad ug maot gyod kaayo ang nahitabo karon sa Israel, dili lang tungod sa kagubot nga nahitabo didto human ningsulong ang mga sakop sa Hamas, kon dili tungod sab sa paagi sa pagbalita sa kagubot.
Matod pa sa balita, sobra sa 800 ka mga tawo ang nangamatay ug mosobra sa 2,000 ka mga tawo ang naangol human mosulong ang mga sakop sa Hamas. Aduna pay balita nga gidagit sab sa Hamas ang dili pa mahibaw-an nga gidaghanon sa mga tawo, apil na niini ang mga taga-Israel, mga Amerikano ug matod pa, naapil sab ang pipila ka mga Pinoy sa gidagit.
Pero kon imong tan-awon ang coverage sa balita, didto naka-focus ang balita sa ka-grabe sa balos nga gihimo sa nasod sa Israel sa mga lugar nga sakop sa Gaza Strip diin anaa mahimutang ang nagsagol nga mga Hamas ug mga sibiliyan.
Kon imong paminawon, sama sa gikalimtan lang ang gihimo nga kabangis sa mga sakop sa Hamas ug gipakita lang ang kabangis sa nasod sa Israel.
Susama kini sa gihimo sa kapulisan. Kon bun-ogon ang usa ka polis, walay kisaw nga madungog pero kon mobalos na ang polis, dako na kaayong kagubot ang moresulta.
O, sa mga sakop sa armadong kusog sa nasod.
Kon bombahan sila sa mga rebelde, ug moresulta sa kamatayon sa mga sundalo, wala kaayoy kisaw. Pero kon mobalos na ang mga sundalo sa mga rebelde, mogawas dayon ang isyo sa paglapas sa tawhanong katungod o human rights.
Daghan ang natingala og nganong wala makabantay ang Israel sa gihimong pagsulong sa mga sakop sa Hamas.
Dili ikalimod nga gituhoan nga moderno na kaayo ang kasundalohan sa nasod sa Israel, ug ilado na kaayo ang kahanas sa ilang mga intelligence agencies sama sa Mossad.
Pero sama sa nagmata lang og morning ang Mossad ug wala gyod makabantay sa gihimong pagsulong sa mga sakop sa Hamas.
Ngano kaha?
Matod pa, dili kuno angay maguol ang Pilipinas sa miulbo nga kagubot sa Israel tungod kay wala kita magsalig sa Israel sa atong pagkaon ug uban pa nga mga produkto.
Morag binuang kining maong huna-huna. Kon tan-awon sa rekords sa Department of Foreign Affairs (DFA), daghang Pinoy ang nagtrabaho sa Israel isip mga caregivers. Kini sila mga overseas Filipino worker (OFW) nga apil sa nagpadala og mga dolyar sa atong nasod.
Kay nagbayad sila og buhis sa nasod, adunay obligasyon ang kagamhanan sa Pilipinas nga hatagan og proteksiyon ug seguroon nga luwas sa mga kakuyaw ang maong Pinoy nga mga OFW.
Dili pa usab maklaro kon kanus-a mahuman ang maong kagubot ug hayan makaapekto kini sa presyo sa krudo sa tibuok kalibotan.
Wala pa kini labot sa kalisod kon mangayo sa ransom ang mga Hamas sa mga tawo nga ilang gidagit.
Mobayad ba o ihatag ba sa Israel ug Amerika ang pangayoon nga ransom o kondisyon sa pagbuhi sa mga gibihag?
Morag lisod kini mahitabo.
Nganong nagnihit ang mga papel de bangko karong mga panahona?
Tungod ba kini sa umaabot nga piniliay sa Barangay and Sanggunaing Kabataa Elections (BSKE)?
Nagpasabot ba kini nga gitapok na sa mga kandidato ang mga papel de bangko isip apil sa ilang pagpangandam sa kampanya sa maong piniliay?
Kon mao man kini, nagpasabot ba nga magbaha gihapon ang kwarta karong piniliay sa BSKE?