Daghan ang gusto nga ibalik ang mandatory nga Reserve Officer Training Corps (ROTC) program sa kolehiyo tungod sa daghang mga rason ug hinungdan.
Kon imong basahon ang katuyoan sa ROTC program, way lalis nga maayo kini ug makaayo sab sa atong kabataan.
Pero unsay may dakong problema sa ROTC program?
Una, giabusahan kini sa mga nagdumala niini, sama pananglit sa hazing.
Ikaduha, gihimo kining “gatasan” sa mga nagdumala niini.
Ikatulo, tungod sa abusar sa mga nagdumala, nausab ug nahimong ngil-ad na hinuon ang pagtuo sa kadaghanan sa mga kadete ug ilang mga ginikanan bahin sa maong programa.
* * *
Kon matagad lang unta ang maong mga isyo batok sa ROTC program, husto kaayo nga himuon kining mandatory alang sa mga nag-eskuyla sa kolehiyo.
Daghan ang mapupo nga mga maayong pagtulon-an ang ROTC program ngadto sa mga kadete, ilabi na gayod kadtong gusto mokuha sa advance ROTC program aron mahimong opisyal sa ROTC.
Pero kon magpadayon ang mga kurakot, abusado ug mga iresponsable nga maoy modumala sa maong programa, maayo pay ipadayon ang optional nga paagi ubos sa National Service Training Program (NSTP).
* * *
Adunay eskuylahan karong bag-o lang nga mibukas sa ilang medical program. Kon tan-awon ang ilang mga gipang-anunsiyo, klaro kaayo nga aduna silay mga maayong katuyoan.
Pero daghang mga isyo nga angay atubangon ang maong eskuylahan.
Usa niini, dili pa klaro kon gipanag-iya ba gyod sa eskuylahan ang luna sa yuta diin mahimutang ang eskuylahan.
Sumala sa atong nahibaw-an, anaa pa sa pangalan sa probinsiya ang yuta diin nahimutang ang eskuylahan ug wala pay migawas nga mga kasayoran nga gi-donar o gibaligya ba ang maong yuta ngadto sa maong eskuylahan.
Importante ang maong isyo sanglit gilatid man sa balaod nga ang eskuylahan maoy tag-iya sa yuta nga gibarogan niini. Nasayod ang CHED niini sanglit sila man ang nagdumala sa higher education sa atong nasod.
Ang pangutana - kon nasayod ang CHEd niini sanglit molingkod man ang Chairman/Commissioner sa board sa maong eskuylahan, unsa may gibuhat nila aron ma-resolba ang maong isyo?
Dili ba bakikaw paminawon nga istrikto ang CHED sa pagpatuman sa balaod sa mga pribadong kolehiyo pero luag kon mga SUC na ang hisgotan?