Editoryal: Angay bang i-ban ang motorsiklo?

Duna gyuy mga tawo nga naghuna-huna niini, labina niadtong mga nanag-iya og four-wheeled nga mga sakyanan nga gihasulan sa mga nagmotorsiklo.

Sa ubang mga nasod, sama sa dakong siyudad sa Guangzhou, China, ilang gi-ban ang motorsiklo sa sentro sa siyudad sugod sa 2007 tungod sa kadaghan sa mga aksidente ning mao nga matang sa sakyanan. Wa mag-inusara ang mao nga siyudad sa China sa pag-ban niini tungod gihapon sa kadaghan sa mga aksidente nga gikalambigitan niini.

Statistically, nangminos ang gidaghanon sa mga aksidente human gi-ban ang mga motorsiklo busa gipadayon sa ilang kagamhanan ang ban niini sa highly urbanized cities.

Apan dinhi sa Pilipinas, lisod kaayo ning buhaton tungod sa kabati ug kakuwang sa publikong transportasyon ug grabeng kahimtang sa trapiko.

Kon magmotorsiklo ka, paspas ang biyahe ug dali ang pag-abot kay sa mag PUJ o mag bus. Ang usa ka oras nga biyahe mahimo lang 20-30 minutos.

Gawas pa, nanaghan ang motorsiklo di tungod kay ganahan ang tanang mga tawo nga manggamit niini. Ang mga tag-iya nanggamit niini alang sa trabaho ug kadali sa paglakaw.

Niadtong riders nga nanginabuhi niini, mao lang ni ang ilang tinubdan sa panginabuhi, wa nay lain pa. Daghan ang nabuhi tungod sa motorsiklo.

Ang pagpaminos sa mga aksidente mao ang dakong hagit sa kadagkoan sa kagamhanan, labina sa mga opisyal sa transportasyon ug trapiko. Nagkadaghan ang mga aksidente sa motorsiklo bunga sa pagpataka og padagan, di lang sa mga drayber sa two-wheeled nga mga sakyanan, apil na ang upat ka ligid.

Mao unta ni ang tun-an og maayo sa mga opisyal sa kagamhanan, inabagan sa mga eksperto aron himoan og mga polisiya sa ingon maminosan ang kadaghanon sa mga aksidente nga mosangko sa kamatayon.

Sama sa estriktong pagpatuman og speed limit ug sa mga balaod sa trapiko. Suwayan ang pagbutang og lane sa mga motorsiklo sa lapad nga mga karsada, sama sa Cebu South Coastal Road.

Nganong di man suwayan ang mga lakang, inay nga isalikway kay dunay nangsupak? Gikinahanglan ang mga eksperimento aron masuwayan kon epektibo ba ang kausaban. Kon dili epektibo, ibalik sa kanhiay ug mangita na sab og laing paagi, suwayan kon mohaum na ba.

Kon pasagdan ang sitwasyon karon, way mga kausaban ug higpit nga pagpatuman sa mga lagda sa trapiko, mosamot pa pagdaghan ang mga mga aksidente sa kadalanan. Di huwaton nga managhan pa ang mga kinabuhi nga makalas.