Nabanhaw na sab ang mga balaudnon sa dibursiyo. Ang nag-unang nangusog karon ang bag-ong senador nga si Robin Padilla.
Sa iyang pagduso sa balaud, siya nipasabot nga ang balaudnon sa dibursiyo manalipod, dili magguba sa pamilya. Iyang gitumbok ang kadaghan sa mga babayeng nag-antos sulod sa kaminyuon nga wa nay kalipay tungod sa mga pangabuso sa bana.
Ang Pilipinas dunay balaud sa annulment, apan ang dako kaayong babag mao ang kadako sa gastuhon ug sa iyang kadugayon. Ang mga probisyon sa balaud gud sa Pilipinas gibase sa Canon Law sa simbahang Katoliko.
Molanat ang procedure sa annulment gikan sa unom ka buwan ngadto sa upat ka mga tuig. Mogasto sab kini og labing minos P150,000, wa pay labot ang kahasol sa pagtambong sa mga court proceeding.
Kon ang gasto pagamyan ug pamub-an ang kadugayon nga di molapas sa usa ka tuig, wa na kinahanglana pa ang balaud sa divorce. Mao kini ang duha ka dagkong mga babag nga kon mausab lang, mogaan ang pag-antos sa partido nga gustong mogawas sa kaminyuon.
Pait tuod ang dangatan sa usa ka asawa nga gipaantos sa bana. Gusto siyang molingkawas sa kaminyuon nga sama na og impiyerno, apan di siya makahimo tungod sa kadako sa gastuhon ug kataas sa proseso.
Mao nang daghan ang moluom na lang ug maghilom.
Apan duna may balaud batok sa pangabuso sa kababayen-an ug duna say institusyon, sama sa Dept. Social Welfare and Development (DSWD) nga madangpan. Magiyahan pa ang babaye sa angay buhaton aron di makapatuyang ang lalaki sa pag-abuso. Busa, wa kinahanglana ang dibursyo, ang pag-usab lang sa mga lagda sa annulment ang gikinahanglan.