HUMAN niawhag si Presidente Rodrigo Duterte sa 1,914 ka mga convict nga nakapahimus sa Good Conduct Time Allowance (GTCA) law nga motahan sud sa 15 adlaw, upat na dinhi sa Sugbo ang ningsanong.
Ang tulo nga una nang ningtahan puro yano nga mga tawo nga nasilutan og bug-at tungod sa linuog nga mga krimen nga ilang nahimo. Usa niini mao si Jesus Negro, Jr., alyas Boy Negro.
Nakombikto siya sa walo ka mga kasong murder ug attempted murder human sa hitabo sa Minglanilla niadtong 1988, sumala pa niya. Sulod sa bilanggoan, nagtinarong siya. Gani, didto niya hikaplagi ang gugma niya sa art.
Tuod man, nahimo siyang inmate art teacher ug nakadawat og mga pasidungog sa lainlaing ahensya sa kagamhanan.
Siya ug ang lain pang tulo, wa mobayad og kwarta kay si Negro lang gani, wa siya makauli dinhi sa Sugbo sakay sa barko kon wa pa siya tabangi sa usa ka pulis nga naluoy kaniya. Ang pulis nidakop kaniya sa dihang nangihi siya sa Luneta, diin siya natulog sud sa usa ka semana.
Kon kining mga tawhana nakapasar sa tinarong ug dinisyos nga assessment sa mga awtoridad sa Bureau of Corrections (BuCor) base sa Implementing Rules and Regulations (IRR), nganong di man sila hatagan og kahigayunan nga makapuyo sa gawas subay sa bag-ong kinabuhi human serbisyuhi sa taas nga panahon ang krimen nga ilang nahimo?
Sa kadugay na sa panahon sa ilang pagpuyo sa bilanggoan, sama sa kaso ni Negro, iyang nakaplagan ang gugma sa pagdibuho nga maoy iyang paglaum ug kahayag. Ingon sa naghatag kaniya og laing kahigayunan nga magbag-o.
Hinaut pa nga paspasan usab sa BuCor ang proseso sa pagsusi sa tagsa nila ka kaso aron di na sila mahikawan pa sa pagpuyo sa bag-ong kinabuhi nga ilang nakaplagan human sa hataas nga panahon sulod sa National Bilibid Prisons (NBP). Hayag na unta ang ilang kinabuhi, apan nibalik og kisdom.