Daghang mga dapit sa kalibutan ang nangaigo sa baha tungod sa way hunong nga uwan. Labing minos 20 porsyento sa Pakistan gilunopan. Pipila ka mga semana ang nakalabay, dunay mga dapit sa South Korea nga gibahaan.
Daghang mga dapit sa China naigo sa huwaw apan duna say mga dapit nga gibahaan tungod sa uwan. Kining tanan gibasol ngadto sa global warming nga nakaingon sa grabeng kadaghan sa tubig-uwan ug sa ubang mga dapit, way undang undang.
Niadtong 2009, dunay mga climate expert nipahimangno nga daghang mga dapit sa Cebu sa 2020 ang malunopan tungod sa pagsaka sa level sa dagat bunga sa pagkahilis sa polar ice caps dala gihapon sa global warming.
Wa kini mahitabo kay 2022 na man lang, uga pa man gani ang pier area ug kabaybayunan sa Cebu. Apan hayan kini ang usa sa mga hinungdan nga daghang mga dapit sa Metro Cebu ang malunopan matag bunok sa uwan kon maatol nga taub. Nahimong misamot tungod sa kadaghan sa mga basura, labina plastic bottles, ug barado na nga mga drainage.
Busa, bisan pa og panggub-on ang mga estrukturang milapas sa three-meter easement, di gihapon ni garantisado nga maundang na ang baha sa mga dapit nga naa sa ubos ug duol sa dagat. Duna na may igong teknolohiya karon ug mga eksperto, maayo pa nga ang mga local government unit (LGU) sa Metro Cebu mokuha sa ilang serbisyo aron mapangitaan og mga pamaagi nga di kaayo mograbe ang epekto sa global warming sa mga komunidad nga duol sa dagat.
Sa pagkakaron, nakatutok og maayo ang mga LGU ug uban pa nilang mga katambayayong sa pribadong sektor sa pag-usab sa drainage master plan. Wa kaayo makonsiderar ang epekto sa global warming sa pagplano aron unta mapangitaan og paagi nga maminusan ang dautang epekto niini.
Hinaut pang mahuna-hunaan kini sa mga opisyal aron di mag-anam og kadaghan ang manglangoy matag baha.