Ang mga pangandoy ni Cebu City Mayor Michael Rama alang sa dakbayan sa Sugbo dalaygon. Bahin sa Singapore-like nga bisyon, taliwala sa mga pagsaway tungod sa kalayo sa tinuod nga sitwasyon, apan maayo kini nga inspirasyon.
Naobserbahan nga ang mayor halos dili na makapundo og hataas nga panahon sa City Hal. Molarga matag karon-ug-unya sa sulod ug ngadto sa gawas sa nasod, ubos sa personal o opisyal nga katuyoan. Sa kasamtangan, ang mayor tua na sad sa Australia aron pagtambong sa usa ka summit.
Ug sa iyang mga pagbiyahe, ang maayo kanunay nato madunggan nga siya maghisgot nga magdani og mga mamumuhunang langyaw alang sa dugang kalamboan sa dakbayan. Apan nasayod ba siya sa kahimtang sa iyang minahal nga siyudad? Basin masurprisa ang iyang gipangdani nga mamuhonan.
Pananglitan, ang nagbalikbalik nga problema sa basura, kahuot sa trapiko, ang pagsaka sa kriminalidad, pagdagsang sa ilegal nga drugas, daghang squatters, ug uban pa - mga hulagway nga nasukwahi sa gusto ni Rama.
Ang gusto masayran ug maayong makita sa katawhan kon unsay undanong gibuhat sa liderato sa Dakbayan aron matubag kining mga problema. Dili kita maghandom nga dunay wala mailhing salbador del mundo o benefactor nga moluwas kanato?
Batakan usab nga pundasyon sa pag-andam o pagpanha-ay sa dakbayan labina sa mga inprastraktura nga mas makadani sa mga negosyante, dili lang langyaw, lakip sa mga lokal nga mobubo og puhonan. Naobserbahan nga ang atong mayor ganahan nga mosulti sa iyang mga pangandoy alang sa dakbayan, apan way igong katugbang nga aksiyon. Maingon ba kaha nato nga kini kutob na lang sa pulong lang? Hinaut nga dili unta.
Ug isip mabuot nga lungsoranon, nasayod kita sa kadaghan sa giatiman sa mayor lakip sa iyang personal nga kinabuhi, sama kanato, tawo usab siya ug dili superhero. Busa mohimo usab kita sa atong ginagmay nga pag-abag alang sa kalamboan sa dakbayan ug kabulahanan natong tanan.