Nganong lihay kaayo si Mayor Michael Rama sa pangutana, kinsa ang naggasto sa iyang tulo ka adlaw nga biyahe sa Boracay uban sa dili mominos 176 ka mga tawo nga kasagaran mga barangay kapitan niadtong Hunyo 23, 24 ug 25, 2023?
Ang giklaro ni Rama nga walay pundo gikan sa panudlanan sa kagamhanan. Personal? Lisod katuohan tungod sa kadako sa kantidad bisan sa imong tinamban nga pagkwenta sa gasto sa plite sa ayroplano, hotel, pagkaon ug uban pa.
Busa motumaw ang pagduda sa yano nga tawo nga dunay nagpaluyo sa ilang biyahe, labina nga ang ilang gipuy-an nga hotel dunay koneksiyon sa usa ka kompaniya nga nagtrabaho sa dakong proyekto sa dakbayan sa Sugbo hinungdan nga dili mabutyag sa mayor.
Abogado si Rama ug gilibutan usab siya sa mga banggiitang abogado, mas nasayod sila sa linugdangan sa ilang gihimo. Ug pangutana lang, dili kaha kini ang hinungdan unya sa laing problema sa karera sa pulitika ni Rama? Ang kontra mangita ra ba gyud og bikil.
Sa yano nga pag-aninaw, bisan moingon si Rama nga personal kadto nga biyahe, apan kinahanglang sihag unta siya human naglambigit kini og mga piniling opisyal sa barangay ug mga kawani sa City Hall, labina nga nagsingabot ang eleksiyon sa barangay.
Dili sayop ang iyang pagpangimbitar sa mga opisyal sa pagsuroy sa Boracay ubos sa demokrasya. Ang nakalisod kon dunay nag-sponsor labina gikan sa pribadong kompaniya. Mahulog kini sa usa ka matang sa suborno labina sa kadako sa gasto.
Apan gihimakak na kini ni Rama sa daghang interviews sa media. Giklaro nga ang budget sa biyahe wala maggikan sa panudlanan sa Dakbayan. Hinuon, dili kita makakwestiyon sa pagka adunahan ni Rama, kinsa kaliwat sa karaang pamilya sa Sugbo.
Mao ni gikaingon, magpaabot na lang kita sa resulta sa nagkalainlaing reaksiyon sa kontrobersiyal nga biyahe sa mayor sa Boracay.