Mahuman na lang ang termino ni Presidente Rodrigo Duterte, apan wa pay bisan anino na lang sa usa ka haligi sa pasilidad sa Bus Rapid Transit (BRT) system ang nakita.
Tinuod, nagpatawag og tigom ang grupo nga gitahasan aning BRT sa mga kooperatiba sa transportasiyon kay maapektuhan sa pagsugod unya sa biyahe sa mga bus ang rota nga lagbasan niani. Hayan anha na lang sila sa karsada nga gamitong feeder sa mga station. Sa sayong bahin sa administrasiyon ni anhing presidente Benigno Aquino III giestoryahan ug gipangandaman na ang pagtukod sa BRT nga niadto pang 80s gihisgutan nga gamiton nga transport system sa siyudad. Nahuman na lang ang termino ni Aquino, bisan anino way nakita.
Na-excited na ang mga Sugboanon kay maorag mas duol na ang katinuoran nga kini matukod sa panahon ni Presidente Rodrigo Duterte labina kay naa dinhi ang Office of the Presidential Assistant for the Visayas (OPAV) ni Secretary Michael Dino.
Grabe ang paninguha ni Dino nga mapatuman ang BRT, apan dunay mga kausaban sa desinyo tungod kay ang kahimtang sa trapiko sa kaniadto ug karon managlahi kaayo. Hayan, tungod sa suporta sa Sugbo sa kandidatura ni President-elect Ferdinand Marcos Jr., dako ang paglaum sa local officials, ug hayan mismo si Dino, nga madayon na ang BRT sud ning mao nga administrasiyon.
Apan kinahanglan usab nga paspasan o idungandungan ang pagtukod sa uban pang public transport, sama sa elevated nga monorail. Tinuod nga tungod sa kahagip-ot sa mga karsada karon, mamahimo na hinuong problema, di solusiyon, ang BRT nga nahitabo sa ubang mga nasod sama sa kasinatian sa Thailand.
Ang solusiyon gud sa trapiko sa usa ka dapit wa magpasabot nga magamit usab kini sa uban. Nagdepende kini sa kahimtang ug sitwasiyon sa trapiko ug palibot niini.
Taliwa ning mga hagit, hinaut pa nga sud sa administrasiyong Marcos, ang damgo sa mga Sugboanon matinuod na.