Sulod na sa daghang katuigan nga nag-antos ang katawhan sa mapahimuslanon nga mga negusyante. Ang labing uwahi ug klaro mao ang pagsabotahe sa presyo sa sibuyas bombay.
Nakaplagan sa imbestigasyon sa National Bureau of Investigation (NBI) nga dunay mga tawo nga nagpaluyo niini, apil na ang mga opisyal sa kagamhanan. Nitumaw sa imbestigasyon nga dunay negusyante dinhi sa Sugbo nga apil sa hoarding sa mga sibuyas bombay.
Di ba miabot sa kamerkaduhan dinhi sa Sugbo og P750 ang kilo sa sibuyas bombay sa hinapos sa 2022? Grabe kaayo ang pagsaka tungod sa pagpahimulos sa mga negusyante sa pagpaburot sa presyo. Baga pa kaayo og mga nawong sa pag-atubang sa Senado ug Ubos Balay Balauranan kay maayo pa kaayo nga mangatik, di mangangkon.
Karon, dunay giduso nga balaudnon nga Republic Act 10845, kun Anti-Agricultural Smuggling Act of 2016, nga gi-certify as urgent.
Ang pagpanago og mga produkto sa agrikultura ug pagmugna og mga presyo nga gipaburot og maayo matawag na nga economic sabotage. Kon economic sabotage, usa kini ka bug-at nga krimen.
Pinaagi niini, bug-at nga silot ang mapahamtang sa mga mapalgan nga nagbuhat niini, sama sa pagkabilanggo sa tibuok kinabuhi. Ang mga naa sa kagamhanan nga masakpang kakunsabo, masilutan sab sa tibuok kinabuhi nga pagka disqualify sa pagkupot og katungdanan sa kagamhanan.
Panahon na nga tinud-on sa kagamhanan ang pagpahamtang og bug-at nga silot sa mao nga mga tawo nga sa dugay nang panahon nagduot sa nasod padulong sa ubos.
Kada umento sa presyo sa mga produkto sa agrikultura, ang apektado kaayo mao ang mga kabos.
Ang mga mag-uuma nga tinubdan sa mga produkto sa agrikultura pahimudsan sab kay baratuhon og maayo ang pagpalit sa mga wholesaler sa ilang produkto, hulgaon pa kini nga di mahalin ug mangadaut lang ang ilang baligya. Mapugos intawon pagbaligya ang kabos nga mga mag-uuma.
Hinaot pa’ng ning balaudnon, matuldokan na ang krimen sa mga mapahimudsanon.