Dunay di maayong nakaplagan ang Commission on Audit (COA) sa pagpanghatag sa Dakbayan sa Sugbo og hinabang ngadto sa mga biktima sa bagyong Odette nga niigo niadtong Disyembre 2021.
Sa ilang audit report, nipahigayon ang COA og random written interview sa 241 ka mga residente sa 10 ka nagkalainlaing mga barangay aron pagsusi kon nasunod ba ang guidelines sa pagpanghatag sa ayuda nga P5,000. Sa respondents, 91 nitubag og yes samtang ang 150 nitubag og no sa pangutana kon nakadawat ba sila og hinanang gikan sa Siyudad.
Dunay mga residente nga niingon nga wa sila napili tungod kay nadaot ra ang ilang balay. Nakaplagan sab sa mga auditor nga dunay 296 ka mga ngan o beneficiaries nga nalista kaduha o katulo, 226 niini, nga kwalipikadong nakadawat, apan sa lainlaing barangay.
Matod sa COA nga ang wa pagsunod sa guidelines nagbukas sa ganghaan sa pagpanikas.
Duna nay mga reklamo nga niabot sa buhatan ni Mayor Michael Rama kalabot sa mga ngan nga gipanglista ug nakadawat sa hinabang. Apan daghan ang nangreklamo nga wa sila giapil sa mga personnel sa barangay, hinunoa lain ang nalista nga wa gani maguba ang balay.
Kahibulongan usab nga dunay mga ngan nga nasukip sa nagkalainlain barangay isip beneficiaries nga moabot og 226 nga nakadawat sa kinatibuk-an og P1.480 million.
Wa na mahisguti ang dagan sa imbestigasyon nga gimando sa mayor human nibaha ang mga reklamo sa social media. Ang COA report nagkompirmar nga dunay katinuoran ang reklamo nga dunay doble, triple sa pagdawat sa hinabang.
Matod sa COA, ang mga buslot sa paghatag og hinabang nakamugna og kakuwang sa pagsalig sa katawhan ngadto sa kagamhanan. Naghatag usab kini og dalan sa pagpanikas.
Ning finding sa COA, hinaot pang mohimo og lakang ang Siyudad aron di na kini masubli. Estriktong sundon ang guidelines aron ang tanang makadawat angay sa pagdawat sa hinabang ug di matikasan ang kagamhanan.
Maayo sab kon dunay manubag.