Ni-file si Davao City Mayor Sara Duterte-Carpio sa iyang certificate of candidacy (COC) pagka bise presidente sa 2022 elections. Paglabay sa pipila ka mga oras, ni-withdraw sa iyang kandidatura pagka bise presidente si Senador Christopher Lawrence “Bong” Go ug niduso sa iyang COC pagka presidente.
Gikuyogan siya ni Presidente Rodrigo Duterte sa pag file sa Commission on Elections (Comelec) niadtong Sabado.
Karon nga naklaro na nga si Go magpapili pagka presidente sa 2022 elections, duna ba kaha siyay purohan pagdaug? Kon mokampanya og maayo si Duterte kang Bong Go, dunay kahigayunan nga ma-upset ang dagan karon sa pulitika.
Ang makinarya ug propaganda nga alang unta kang Duterte-Carpio, ari na iyabo sa senador. Mismo si Duterte posibleng maninguha og maayo nga modaug ang iyang kanhi pangabaga.
Di ikalimod nga si Duterte taas pa kaayo og trust rating bisan kon nikibra kini sa nakalabay nga mga buwan.Bisan ang nangaging mga presidente wa makaangkon sa kataas sa rating nga naangkon karon sa Presidente. Sa ato pa, posible kaayong mabalhin ngadto kang Go ang suporta.
Sa tanang mga kandidato sa pagka bise presidente, ning higayuna, si Duterte-Carpio gihapon ang labing kusog. Nakasabak kaniya ang Lakas-CMD ug partido sa administrasyon, PDP-Laban Cusi Wing.
Kon basehan ang nangaging surveys, di kaayo kusog si kanhi senador Bongbong Marcos. Layo ra kaayo siya sa mga survey ni Duterte-Carpio.
Ning higayuna, matawag nga dark horse si Go sa tanang mga presidential candidate bisan tuod kon uwahi na kaayo siyang miitsa sa iyang kawo alang sa labing taas nga posisyon sa nasod.
Tungod sa iyang gipangtukod nga Malasakit centers sa nagkadaiyang mga dapit sa nasod, hagbay rang nakalibot si Go nga ingon sa nangampanya na. Bisan gud kon siya senador, nahug siyang alter-ego sa Presidente. Busa, Posible kaayo ang Go-Duterte Carpio sa 2022.