Grabe ang kampanya sa Land Transportation Office (LTO) batok sa mga driver ug mga tag-iya sa mga sakyanan nga dunay mga kalapasan sa balaod sa trapiko. Ehemplo niini mao ang mga operasyon sa mga personnel sa LTO sa Transcentral Highway (TCH) bisan Sabado ug Dominggo.
Target sagad sa operasyon mao ang mga motorsiklo nga saba ang tambutso ug nalab-anan ang light accessories sa gitakda nga guideline sa buhatan sa mga suga nga ipangtaud. Daghan ang nangadakpan ug naisyuhan og Temporary Operator’s Permit (TOP).
Sa miaging semana, nakatilaw usab ang mga taga Bohol sa ilang mga operasyon. Gatusan ka mga drayber ug tag-iya sa mga motorsiklo ang naisyuhan og TOP.
Dalaygon kini nga kampanya sa LTO nga gitumong aron mas luwas ang kadalanan gikan sa mga drayber nga way kasayuran kalabot sa balaod sa trapiko ug kadto lang de motor nga mga sakyanan nga roadworthy ang padaganon.
Di sab maayo ang mga motorsiklo nga nalab-anan sa kadaghan sa mga suga kay sila ang usa sa mga hinungdan sa mga aksidente kay suwaw sa kasugat nga mga drayber. Disturbo usab sa publiko ang langas kaayo nga mga motorsiklo, uban kanila maorag nakatag-iya sa mga karsada kon mopadagan, tungod sa saba nga tambutso.
Taliwa ning tanan nga mga kampanya, gisaway gihapon ang LTO tungod sa nagpabiling fixers sa pipila sa ilang mga buhatan. Usa ka post sa usa ka netizen nga ni-renew sa iyang lisensya nakasinati sa mga pagbalibad sa mga personnel sa buhatan kay wa nay slots kada niya adto.
Apan dunay nangtanyag nga mga tawo, giingong apil pang nanghunghong ang guwardya, alang sa serbisyo. Padayon kining mao nga hungihong bisan sa gipakitang paninguha ning mao nga buhatan sa paglimpyo sa badlungong mga ginsakpan.
Apan ingon sa sama sa pader kalig-on kining uban diha, kay tak-om man ang ubang officials bisan sa mga reklamo sa netizens nga nakasinati niini.