Gidapit ni Mayor Junard “Ahong” Chan sa usa ka tigom ang mga fixer sa gawas sa buhatan sa Land Transportation Office (LTO) sa dakbayan sa Lapu-Lapu, di aron mamahimong legal, apan aron sila matabangan sa ilang panginabuhi.
Kining mga fixer mao ni ang mga tawo nga motanyag og mga serbisyo sa giingong pagpadali ug kasayon sa paghimo og mga transaksyon sulod sa buhatan bugti sa bayad. Sagad usab ani nila dunay mga kaila sulod sa buhatan.
Wa nakauyon niini si LTO Regional Director Victor Caindec hinungdan nga nihangyo siya sa National Bureau of Investigation (NBI) 7 nga moimbestigar sa “self confessed” fixers.
Maayo kaayo ang tumong sa mayor, apan bisan unsaon, ang fixing di husto, di legal. Kay duna bayay mga fixer nga nagtanyag og peke nga mga driver’s license ug uban pa. Daghan na ang nangabiktima niini.
Busa ang pagtabang sa mga fixer aron gamiton sila sa mga kliyente sa LTO di maka- sa problema. Sama na hinuon kini og naghatag og legal nga dagway sa fixing.
Gamay ra man ning gidaghanon sa mao nga mga tawo. Mas maayo nga pangitaan ni Chan og paagi aron makapanginabuhi sila sa matarong, laing paagi isip iyang mga konstituente.
Sukad sa iyang pangatungdanan, daghan na kaayo og natabangan nga mga lumolupyo sa dakbayan sa Lapu-Lapu ang mayor nga kanunay nagtagad sa ilang mga panginahanglan.
Usa ni sa nakapadani ug nakapa kombinser sa mga taga dakbayan nga maoy hinungdan sa landslide nga kadaugan sa mayor ug sa tanan niyang mga sakop sa slate sa miaging eleksyon sa Mayo sa miaging tuig.
Unya kadtong nagbisyo og drugas nga fixers, hatagan og ikaduhang chance sa mayor, sila magpa-rehabilitate ubos sa abag sa Siyudad.
Angay usab nga makigkita si Caindec sa mayor ug pasalamatan kay misayon kaniya ang pagsulbad sa problema sa fixing sa gibuhat sa mayor, kinsang katuyoan mao ang pagtabang.