Kanunay mohimakak ang mga opisyal sa Land Transportation Office (LTO) bahin sa fixers o mga ahente nga pribadong indibiduwal nga motanyag og serbisyo alang sa pagpalusot o mopadali sa transksiyon bugti sa igong kantidad.
Apan ‘dayag nga sekreto’ nga nagpadayon gihapon kini. Usa sa kamatuoran niini, si Lapu-Lapu City Mayor Junard ‘Ahong’ Chan, dili pa lang dugay, nipawatag og tigom sa fixers sa LTO Lapu-Lapu. Buot sa mayor organisahon aron dili motanyag og illegal nga kalihokan.
Gikasuko ni LTO 7 Director Victor Emmanuel Caindec ang naasoy nga taho ug nibahad nga iyang ipawatag ang ‘self-confessed fixers’ sa LTO Lapu-Lapu gumikan kay kalapasan kini sa lagda sa buhatan. Apan sa pagkakaron, walay kalamboan ang maong isyu.
Hinuon, ang Department of Transportation (DOTr) nilusad niadtong Pebrero 14, 2023, sa Online Motor Vehicle Registration (Sa way kalapasan). Ang mga motorista dili maglinya sa LTO District Offices ug mogamit sa Land Transportation Management System or LTMS portal sa pag-renew sa ilang motor vehicle.
Kabahin kini sa pagsagop sa moderno nga pagdumala sa buhatan.
Si LTO Assistant Secretary Jose Arturo Tugade nagkanayon nga mga tag-iya og motorsiklo, lakip sa private individuals o companies ug organisasyon makapa-renew sa rehistrasyon sa LTMS portal, diin gibanabana nga mahuman lang sulod sa 10 minutos.
Nindot kini nga kalamboan sa LTO alang sa minilyon nga motorista sa tibuok nasud. Mas sayon ug naghatag og laing kapilian sa pagparehistro sa buhatan nga sentro sa daghang reklamo. Apan nagpabiling pangutana, makawala kaha kini sa hingpit sa fixers sa LTO?
Ang mga fixer dili kawani sa LTO apan makita nga kanunay magpundo sa sud ug gawas sa buhatan aron motanyag sa ilang serbisyo. Tataw nga dunay kontak sa sulod sa maong buhatan busa makahimo sa ilang diskarte sa mga mobayad nga kliyente.