DUNAY mikiha ngadto sa Ombudsman batok kang Gobernador Gwendolyn Garcia kalabot sa nangamatay sa coronavirus disease 2019 (Covid-19) sa lalawigan sa Sugbo. Gusto nilang manubag ang gobernador sa kamatayon sa mga lumolupyo nga nangaigo sa sakit nga mananakod kaayo.
Sa Nobiyembre 21, 2021 nga talaan sa Department of Health (DOH) 7, naa sa 2,504 ang nangamatay sa Covid-19.
Apan, angay bang basulon ang gobernador sa pagkamatay sa nangasakit sa Covid-19? Siya ba ang mabasol nga nangatakdan ug nangamatay kining mga tawhana? Duna bay pagpabaya nga nahimo ang Kapitolyo?
Una, di lang ang Lalawigan sa Sugbo ang namatyan og mga lumolupyo. Dinhi sa Sugbo, tanang mga lokalidad namatyan. Ubos hinuon kaayo ang gidaghanon sa nangamatay kon itandi sa gidaghanon sa ning-survive sa sakit.
Ang numero sa nangamatay naglakip sa duha ka mga igsuong lalake sa gobernador. Gani, nipasaka sila og kiha batok sa mga doktor nga nag-atiman kanila.
Kon gidaghanon tan-awon, labing taas ang mga kaso sa Lalawigan, apan misleading ni tungod kay kon iphon ang populasyon, ang probinsya maoy dunay labing taa
s dinhi sa rehiyon 7. Busa, di angay ikahibung kon labing taas ang gidaghanon sa nangamatay sa lalawigan.
Kon tubayan ang kiha, di kaha angay sab pasakaan og kaso ang ubang mga lokal nga kagamhanan nga namatyan usab og mga lumolupyo, sama sa tri-cities: Cebu City, Mandaue City ug Lapu-Lapu City. Puro ni namatyan. Ang Cebu City ikaduha sa labing daghan og nangamatay sa Covid-19. Naato gani hapit ang mga nitso dihang niigo ang third wave sa Covid.
Wa usab magkuwang si Garcia sa iyang pagpahimangno sa mga lumolupyo. Iyang gibuksan og hinayhinay ang ekonomiya sa lalawigan tungod kay daghan na kaayo ang nag-antos sa kalisod ug kagutom. Mao kini ang iyang tumong kay kon pasagdan, mas daghan pang lunosan sa gutom kay sa nangasakit sa Covid-19. Tungod ini, daghan ang nakadayeg sa gobernador.