Kumusta na ang inyong suweldo? Napatuman ba ang P33 nga usbaw?
Natumong sa Dominggo ang Oktubre 15, busa sagad sa mga kompaniya nihatag sa suweldo sa mga kawani sa Biyernes, Oktubre 13, o karon, Sabado, Oktubre 14.
Kini ang unang kinsina nga masinati ang maong umento nga nipasar sa Regional Tripartite Wages and Productivity Board (RTWPB 7) alang sa minimum wage sa private sector sa Septiyembre 13, apan hingpit nga niepekto sa Oktubre 1.
Kini naghatod sa inadlaw nga suhol sa Class A nga dapit - mga dakbayan sa Carcar, Cebu, Danao, Lapu-Lapu, Mandaue, Naga, ug mga lungsod sa Compostela, Consolacion, Cordova, Lilo-an, Minglanilla, ug San Fernando ngadto sa P468 gikan sa P435.
Sa Class B, ang mga dakbayan sa Bais, Bayawan, Canlaon, Dumaguete, Tanjay, ug Guihulngan sa Negros Oriental, Tagbilaran sa Bohol, ug Talisay, Bogo ug Toledo sa Lalawigan sa Sugbo ngadto sa P430 gikan sa P397.
Ang Class C, ang nahabiling lokal nga kagamhanan sa rehiyon, ngadto sa P420 gikan sa P387 sa non-agriculture establishments. Ang umento sa agriculture ug non-agriculture establishments nga ubos sa 10 ka mga trabahante ngadto sa P458 gikan sa P415.
Asa ka ani nasulod? Ug kon wala kini momarka sa imong nadawat nga suhol, kalapasan kini sa balaod. Mahimong moreklamo sa Department of Labor and Employment (Dole) aron makorihian ang employer. May katugbang kini nga multa ug silot sa magmagahi o dili mopatuman niini.
Apan ang mas makaintrigang pangutana, ang maong umento nakatabang ba sa imong budget? Seguro daghang negatibo og tubag. Di matago nga kamatuoran ang pagsutoy sa presyo sa mga nag-unang palaliton, sama sa bugas ug uban pa, ug pag-usbaw usab sa pletihan sa transportasyon.
Pait, apan matod pa, bisan sa kadugay nga way umento, maayo na lang kining duna, bisan dili igo, kaysa wala. Hinugtanay lang gihapon sa bakos uban sa pag-ampo alang sa maayong panglawas nga nag-unang puhonan sa atong pagpakabuhi matag adlaw.