GIKATAW-AN sa publiko ang bana-bana sa National Economic and Development Authority (Neda) official nga ang usa ka pamilyang Pinoy nga dunay lima ka mga sakop mabuhi sa P10,000 matag buwan.
Si Neda Undersecretary Rosemaria Edillon niingon nga ang labing dako sa budget mahiadto sa bugas humay nga tag P959 matag buwan samtang ang abang tag P1,288. Ang ilang bana-bana nga sa pagkaon, ang pamilya mohurot og P3,834 matag buwan.
Daghan ang nagkatawa tungod kay nasukwahi kini sa tinud-anay nga kahimtang karon sa kinabag-ang Pilipinhon.
Sa urban centers kun sa mga siyudad, lisod man gani nga mabuhi ang duha ka tawo sa mao nga income.
Kini lang tag P959 matag buwan nga budget sa kan-on, paigo kaha ni sa lima ka sakop sa pamilya dinhi sa Cebu? Tagpila ron ang takos sa kan-ong humay? Tag P10 na. Sa ato pa, P50 kada kaon ang magasto kun P150 kada adlaw. Pil-on kini og 30, moabot na kini og P4,500 matag buwan.
Ang presyo usab sa usa ka kilo nga ordinaryong milled rice sa Central Visayas karong Hunyo, kana kon maglung-ag, moabot og P36.40, matod sa data sa Philippine Statistics Authority (PSA).
Kon ang lima ka sakop sa usa ka pamilya mohurot og duha ka kilo kada adlaw, nagpasabot nga mogasto kini og P72.80. Pil-on kini og ka 30, moabot kini og P2,184 matag buwan.
Labing ubos pa kini nga estimate kun bana-bana. Kon mogasto og ingon niani sa kan-on pa lang, unsa na kaha sa sud-an?
Naay abangan, pletihan, gasto sa pagtungha, kuryente ug uban pa. Paigo kaha ang P10,000? Mao nga daghan ang nakapangutana kon asang dapita sa Pilipinas kining data nga gibasehan sa Neda. Sa pagkatinuod lang, magtinga na gani sa kinabuhi ang yanong mamumuo nga molimpyo og P10,000 matag buwan alang ra sa iyang kaugalingon. Basin gidaman ning taga Neda.