Editoryal: Leksiyon sa tanan

(Editorial Cartoon by John Gilbert Manantan)
(Editorial Cartoon by John Gilbert Manantan)

ENOSENTE o dili, makitang katag unsaon sa pagpanalipod sa usa ka 21-anyos nga taga dakbayan sa Danao nga pasakaan na og kaso sa kapulisan karon, Lunes, Disyembre 9, tungod sa pag-post sa fake news bahin sa giingong ‘puting van nga mangdagit og mga bata’ nga nag-trending sa social media.

Kini magsilbi nga leksiyon natong tanan.

Tungod sa maayo nga pagkasaysay sa fake news, ang mga ginikanan nabalaka sa kasegurohan sa mga anak labi na ang naa sa pre-school ug elementarya. Niabot sa punto nga dunay ubang ginikanan nga wala una mopatungha sa ilang anak hangtod dili malkaro ang naasoy nga taho.

Mao kini hinungdan nga ang kapulisan daling nilusad og imbestigasyon ug nasuta nga walay natala nga kaso sa lalawigan sa bahin sa batang nawala, bisan gikan sa mga tunghaan. Walay laing rason, fake news. Ang kapulisan nitutok sa cyber investigation sa pagtumbok sa netizen nga suspek.

Ug natultolan sa Regional Anti-Cyber Crime (Racu) Unit 7 ang unang nag-post sa maong fake news si Brigs Granada Alvaro, ulitawo, tinun-an sa kolehiyo, ug taga Danao. Nakompirmar sa awtoridad nga gimugna lang kini sa hunahuna sa naasoy nga batan-on.

Gikataho nga kini nangayo og pasaylo sa awtoridad apan, kinahanglan manubag siya sa balaud tungod sa pag-abuso sa social media ug mag-atubang siya sa kasong ‘alarm and scandal’ ug kalapasan sa Cyber Crime Law.

Halapad kaayo ug libre ang espasyo sa internet. Daghang flaforms sa social media nga way gipili. Bisan kinsa pwede makasulod ug makagamit o libreng makapakaylap og mensahe bisan sa walay kamatuoran nga panghitabo sama sa gihimo ni Alvaro.

Hinaut nga tinud-on sa kapulisan sa pagkiha ni Alvaro ug ilang ipakita sa publiko nga ang balaud sa Cyber Crime dunay ngipon bisan sa kabag-o sa matang nga kaso.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph