Nagkaduol na ang Abril, deadline sa pag phase out sa traditional PUJ sa tibuok nasod nga maoy gimando sa Department of Transportation (DOTr). Apan kon ang Land Transportation Franchising and Regulatory Board (LTFRB) ang pasultihon, dunay grabeng kakuwang sa mga sakyanang pampubliko kon kini ipatuman.
Dinhi lang sa Metro Cebu, matod sa LTFRB nga 3,000 kapin ka modernized PUJ ang gikinahanglan, apan 800 kapin pa lang ang nagdagan. Kana nagpakita sa dako kaayo kakuwang sa transportasyon kon ipamugos man kini sa DOTr pagpatuman.
Usa sa gitumbok nga kalisdanan sa pagpatuman mao ang kamahal sa mga unit nga dunay presyo nga P1.6 milyunes ngadto sa P2.4 milyunes matag unit. Di lalim bisan kon mga kooperatiba pa ang mopalit. Nagkinahanglan kini og dakong puhonan.
Bisan kon tipik pa sa galastuhan matag unit abagahon sa kagamhanan, di pa kini igo nga makaengganyo sa mga kooperatiba ug operators sa paggasto og dakong puhonan.
Maayo man ang jeepney modernization kay mao kini ang dugay nang gidamgo sa mga sumasakay nga dugay nang nag-antos sa kagubaon sa mga unit nga nagdagan sa kadalanan. Apan kon tingsakay na ug nagdali sa pagpadung sa trabaho ug pagpauli, bisan pag unsa kagubaon sa unit, sakyanan kini sa katawhan tungod sa kadako sa kakuwang sa transportasyon.
Makab-ot ang modernisasyon kon ang kagamhanan mohatag og taas nga panahon, molusad og programa nga magtabang sa mga kooperatiba nga mobayad sa mas gaan nga terms sa loan ug uban pa. Kinahanglan kining himuon kay mao lang ni ang yawe sa pagpadali sa pagpatuman sa modernisasyon sa publikong transportasyon.
Ubanan usab unta kini sa seryusong pagpatuman sa mass transportation, sama sa Bus Rapid Transit (BRT), nga gilubong na lang sa kalimot. Apan sa kahinay ug kakuwang sa interest sa kagamhanan sa pagpatuman, madugayan pa ning modernisasyon sa sakyanan.