Editoryal: Mag-uliay na

Nahuman na ang eleksiyon kagahapon. Hayan gani sa paggawas ning mantalaan duna nay gipangproklamar nga mga mananaug.

Karon nga eleksiyon grabe ka init, di lang panahon, apil na ang mga lalis ug away sa mga netizen. Mga sakop sa pamilya batok sa ilang sakop sa pamilya. Higala batok sa higala.

Naay uban magtawganay og bugo, bugok tanga ug uban pa. Pila kaha ka mga tawo ang nagbungolay tungod lang sa paglaban sa ilang tagsa ka kandidato? Apan bisan unsaon pa sa pagpangugat, bisan usa nila wa ilhi sa mga kandidato nga ilang gilabanan, gibaylo ang katuigan sa lig-on nga relasiyon.

Ang pagpili og kandidato usa ka katungod sa tawo. Sa ato pa, sama sa ubang mga katungod, angay nga respetuhan bisan nasukwahi sa gipili sa uban. Ang tawo nga nipili dunay iyang rason nga gibasehan sa wa pa siya mohukom kinsa ang angay sa iyang boto, nahasupak man o wa sa gipili sa iyang pamilya ug kahigalaan.

Apan naandan na sa ubang mga tawo nga ilang pasundon unsay ilang baruganan ug panan-aw sa isyu. Kon di sila pareho, kasuk-an ug bugalbugalan ang pikas. Ang pagtawag og bogu sa mga netizen sa mga supporter ni kanhi senador Ferdinand Marcos Jr. wa makakombinser ug nakapabalhin sa mga nagsuporta kaniya sukad pa kaniadto. Wa usab matandog ang mga kakampink nga supporters ni Bise Presidente Leni Robredo human tawga ang opisiyal og tanga.

Kini man gud nga mga komento makapalagot, inay makakombinser o makadani ug makapabalhin sa usa ka tawo, bisan pa gani niadtong mga tawo nga neutral. Karon nga nahuman na man ang piniliay, panahon na sab sa pagpasayloay ug panag-uliay aron mahibalik ang kanhiay nga relasiyon. Nganong ibuhis man ang relasiyon tungod lang sa kandidato nga gilabanan?

Kon magkinaunsa, ang kanang mga kandidato nga imong gisuportahan ug modaug di baya na mounong sa imong kalisdanan. Ang naa kanunay mao ang pamilya ug mga higala.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph