NAGGAHIN ang kagamhanan og pundo alang sa bike lanes. Kay kwarta sa kagamhanan, sa ato pa, gikan kini sa buhis sa katawhan. Buhis niadtong wa masulod sa exemption sa income tax ug kadtong mamalit kay naa may expanded value added tax.
Sa Dakbayan sa Mandaue, maanindot ang ilang programa kay human mapasar ang usa ka ordinansa kalabot sa bike lane, nangita sila og paagi aron mabadlong ang mga motorista nga way respeto sa lane. Naay uban nga gihimong parking o waiting area sa four-wheeled nga mga sakyanan.
Busa, ilang gibutangan og plastic bollard nga gipapilit sa karsada. Ubos ni sa pag-abag sa Department of Public Works and Highways.
Sa Siyudad sa Sugbo duna nay ordinansa niadtong 2014, apan sa miaging tuig lang nagsugod sa pagpamutang og bike lanes. Karon naay gipamutang nga bike lanes, apan way gamit kay naay nang park nga mga sakyanan.
Unya, tukar tukar ra sab ang pagpamadlong sa mga enforcer sa Cebu City Transportation Office sa mga nakalapas.
Wa lang unta gidali-dali ang pagmutang og bike lanes. Giuna ang mga major road, labina kining North Road gikan sa utlanan sa Dakbayan sa Mandaue padung sa N. Bacalso Avenue hangtod sa utlanan usab sa Dakbayan sa Talisay. Kana maoy seguradong agianan sa bikers nga nagtrabaho.
Bisan tan-awon pa matag alas 4 hangtod sa alas 6 sa gabii, daghan sa P. del Rosario subay sa N. Bacalso ang magbiseklita nga manguli gikan sa trabaho. Nagpasabot nga kini nga karsada mas maayo kon maoy gihimong prayoridad sa kagamhanan sa pagpamutang og bike lanes.Mas lesser ang karsada nga dunay lanes, mas dali mabantayan sa mga molapas.
Nganong namutang man og bike lane nga gigastuhan sa pundo sa gobiyerno, apan di diay mapatuman ang ordinansa nga nagpaluyo niini? Aron lang gyud ba nga dunay makita nga bike lanes? Kausik sa kwarta.