Nabutyag nga kadaghanan sa mga pagpamusil karon dinhi sa dakbayan sa Sugbo ug hayan sa uban pang mga dapit sa Metro Cebu may kalambigitan sa ilegal nga drugas. Kon di man gani nag-ilugay sa teritoryo, onsehan ang motibo. Wa nakabayad sa illegal drugs nga gibaligya.
Sa ato pa, ang kasagaran sa mga krimen sa pagpatay may kalambigitan sa ilegal nga drugas.
Pipila na sab ka mga suspek nga nangadakpan nangangkon nga sila mga hitman sa dagkong drug operators, kinsang mga amo kasagaran naa sa mga bilanggoan.
Kini nga mga hitabo nagpakita og duha ka mga butang: nagpabilin nga dako ang suliran sa ilegal nga drugas human sa unom ka tuig nga higpit nga kampanya ug ikaduha bisan sa pagkapriso sa mga durugista, nagpadayon ug nipadako pa sila sa ilang network. Naa na gud silay mga hitman.
Makapaguol huna-hunaon nga sa kadaghan sa mga kinabuhi nga nakalas, ingon sa wa matibhangi ang suliran sa ilegal nga drugas. Hinunoa, mao na hinuon ang tinubdan sa grabeng mga krimen nga nag-angin sa imahe sa usa ka lugar. Sama sa Dakbayan sa Sugbo diin nahitabo kining mga pagpamatay.
Di maayo sa imahe sa Cebu City ang mga kaso sa pagpamatay tungod kay timailhan kini sa di maayo nga kahimtang sa peace and order sa lugar. Makapahadlok ug makapaislag kini sa mga buot nga mobisita bisan tungod kon ingnon nga “random” o “isolated” ang mga hitabo.
Natural lang nga managana ang gusto mobisita, lokal o langyaw nga turista.
Makapahimangod usab ang grabe nga kahilom sa Bureau of Jail Management and Penology (BJMP) hangtod karon kabahin sa pagpadayon sa negusyo sa ilegal nga drugas sa mga binilanggo sa mga pasilidad nga ilang gidumala.
Tuod dunay mga imbestigasyon apan kinaugalingon ra sab. Natural, di matagbaw ug magduda gihapon ang publiko kon tinuod ba.
Alang nimo, duna bay kausaban sa kahimtang sa illegal drugs ang kaniadto ug karon?