TANANG mga local government unit (LGU) mingtaho sa pagminos sa mga tawo nga nagpabakuna. Daghan sa mga vaccination site hapit gilangaw kay way hapit tawo nga nangadto.
Di sab tingali ang giingong kahadlok nga mahimong zombie ang mabakunahan sa paglabay sa duha ka mga tuig kay bisan mga edukado apil man sa wa na ganahi magpabakuna.
Tingali kombinasyon kini sa lainlaing mga hinungdan. Usa ini mao ang pagkamatay sa pipila ka mga tawo nga bakunado ug pagkasakit og coronavirus disease 2019 (Covid-19) bisan nahuman na og bakuna.
Laing rason hayan mao ang kalaay sa pagpinaabot sa pagpabakuna hangtod nga nawagtang ang gana. Kadaghan niadto sa mga rehistrado nga tulo ka buwan na lang sa pagpaabot wa gihapon mabakunahi. Dunay nangadto sa mga vaccination site, apan gibalibaran kay pahuwaton sa text message nga ipadala alang sa schedule. Kinsa man say di mahiubos niana nga unta interesado ka man, apan gibalibaran ka? Ganahan ka pang mobalik?
Posible usab nga nakita sa uban nga wa silay makuha nga insentibo gikan sa pagpabakuna. Inay sayon ra ang pagbiyahe, apan daghan sa mga LGU nga mangita gihapon og negatibong swab test bisan kon makapakita ka og card nga fully vaccinated ka na.
Maghuna-huna ang tawo nga nganong magpabakuna pa man siya nga masakit ra man gihapon og Covid? Kadtong duna nay daang sakit di ganahan kay mamatay ra man diay gihapon.
Unta natisok og maayo sa alimpatakan sa katawhan nga ang bakuna di mopagrabe sa kondisyon kon maigo sa Covid. Unta dunay daghang insentibo, gawas sa “bakuna bubble.” Makaguol kay sagad sa mga prebilihiyo ang pribadong sektor ray naghatag.
Nganong di man luagan ang travel restrictions sa mga bakunado? Di lang sa raffle, hatagan og tibuok kinabuhi nga prebilihiyo ang magpabakuna sama sa diskwento nga gihatag sa senior citizens. Mas daghan pang madani ini.