Karon untang buwana magsugod og epekto ang umento sa bayranan sa matag kubiko sa tubig sa Metropolitan Cebu Water District (MCWD) apan wa pa nila masugdi kay wa pa maaprobahi ang ilang hangyo sa Local Water Utility Administration (LWUA).
Dako-dako ang gipangayo nga umento sa MCWD kay naa sa 60 porsyento kay matod sa water firm, dugay na kaayong wa sila makapasaka sa bayranan sa tubig. Walo na ka mga tuig sukad sa katapusang umento. Niadto untang 2020 sila makapatuman apan wa nahinayon tungod sa Covid-19 pandemic.
Si Mayor Michael Rama maoy bugtong mayor sulod sa franchise area sa MCWD nga nipadayag sa sinugdan sa iyang pagsupak sa pagpatuman sa umento kay magdugang kini sa pagsangkiig sa katawhan sa inflation kun pagsaka sa mga presyo sa mga produkto ug uban pa.
Samtang sakto si Rama, apan dunay panginahanglan sa dugang pundo ang MCWD tungod sa ilang pagpalapad sa serbisyo. Tingali, ang anam-anam nga pagpatuman mahimo, kana kon gitugot man sa balaod nga maoy gisubay sa mga water firm sa nasod.
Di ikalimod nga ning nakalabay nga kapin sa usa ka tuig, dako ang paglambo sa supply sa tubig sa franchise area sa MCWD, labina sa kabukiran sa Cebu City nga dugay na kaayong nag-antos sa kakuwang o wa gyuy agas-agas. Dihang wa pa na adjust sa water firm ang pressure sa bag-ong supply sa tubig, nangabuslot ang daan nga mga tubo.
Ang gipangayong umento sa water firm makatarunganon kaayo bisan tuod bug-at sa bulsa sa mga Sugboanon. Apan kon makapalambo kini sa supply sa tubig ug makapa stable niini, seguradong suportahan kini sa iyang mga konsumidor. Di kini supakon.
Apan lagi, kon mahimong anam-anam ang pagpatuman, mas maayo kini tungod kay di lalim ang kalit nga pagsaka sa balayranan. Tanan nangsaka busa, mosamot kabug-at sa bulsa ang laing kalit ug dako nga umento. Hinaot pang mahimo kini sa MCWD.