Dili maayong mamasin bahin sa panglawas, importanteng kining puhonan sa pagpakabuhi. Apan ang pagkasakit kabahin sa atong pagkatawo.
Ug tungod sa kaimportante sa panglawas, ang industriya sa tambal nahimong multi-million nga negosyo.
Mitumaw ang daghang food supplements nga mapalit nga wa na magkinahanglan sa prescription sa doktor sa medisina. Mas luwas gyud kon ang gitumar nga tambal gikan sa prescription sa usa ka doktor. Dili ba?
Dili usab masalikway nga dunay namaayo ang panglawas tungod sa food supplements. Apan magbinantayon kita labina nga daghang mapahimuslanon ning panahona.
Ang Food and Drug Administration (FDA) niluwat og pasidaan sa publiko niadtong Sabado, Agusto 12, 2023, bahin sa lima ka unregistered food supplements sa markado.
Sa Advisory No.2023-1833, ang FDA nagkanayon nga paglikay sa paggamit sa unregistered food supplements nga posible moresulta sa potential health hazards.
“The FDA verified through online monitoring or post-marketing surveillance that the concerned food supplements are not registered, and no corresponding Certificates of Product Registration (CPR) have been issued,” sumala sa FDA.
Naa sa listahan nga gipagawas sa FDA mao ang Venus White Glutathione Dietary Supplement, Venus White Marine Hydrolyzed Collagen Type I & III, Venus White Glutathione Pro Dietary Supplement, Venus White Glutathione Ultra Dietary Supplement, ug Aurifix Ear Health Supplement Ear Vitamin & Mineral Supplement.
Sumala sa FDA, ang pagtumar sa maong mga produkto nga moresulta sa grabeng epekto sa panglawas. “Since these unregistered food supplements have not gone through evaluation process of the FDA, the agency cannot assure its quality and safety,” dugang sa FDA.
Lakip sa atong bantayan kon dili ba peke o tinuod ba kaha ang tatak sa ubang food supplements nga gitomar.
Dili kita basta mokompiyansa.
Gawas sa doktor, mahimong mosusi kon niagi ba kini sa paghashas sa FDA aron dili kita maigo sa karaang panultion nga ‘ulahi na ang pagbasol.’