Namatikdan ni Justice Secretary Jesus Crispin Remulla sa Huwebes, Marso 9, 2023, nga dunay ‘pattern of impunity’ sa Negros Oriental dihang naugkat ang dugay na nga daghang mga kaso sa pagpamatay human sa pag-ataki-patay kang anhing Gov. Roel Degamo sa Marso 4, 2023.
“What comes out is a pattern. It’s a pattern of impunity that we did not sense before. It is something that is so new to us,” matod ni Remulla nga kauban ni Presidente Ferdinand Marcos, Jr. nga nibisita sa haya ni Degamo sa dakbayan sa Dumaguete sa Miyerkules, Marso 8, 2023.
Gipasabot ni Remulla ang bahin sa tulo ka mga kasong pagpatay sa 2019 batok kang Negros Oriental Third District Rep. Arnulfo Teves, kinsa apil sa imbestigaron sa kasong pagpatay kang Degamo ug laing walo mga tawo nga naangin dihang giatake ang gobernador.
Sa usa ka pamahayag, si Teves nihimakak nga dunay kalambigitan sa pagpatay ni Degamo.
Apan ang oberbasyon ni Remulla bahin sa ‘impunity’ dayag kini nga kamatuoran. Dili lang kini ‘pattern’ sa Negros Oriental nga dunay mga kasong pagpatay nga nahilom o wa moirog sa korte, lakip sa ubang bahin sa nasod sama sa Sugbo, labina kon ang mga suspek dako og impluwensiya o naghupot og taas nga posisyon sa kagamhanan.
Dili ba daghang mga kaso sa pagpamatay nga wa masulbad o taudtaod nang nag-ung-ong gihapon sa korte? Ang mga suspek o gituohang utok sa krimen dili basta-basta nga personalidad sa katilingban. Samot na kon ang naapiki nga partido kabos, way igong gahom sa pagpangayo og hustisya.
Lisod nga mahimong kultura ang impunity. Ang balaod kumkomon na lang sa mga kamot human nawad-an og pagsalig sa balaod. Dili kita gusto nga motunhay kini. Ug kita lang usab ang nag-unang hinagiban sa pagpuhag sa impunity pinaagi sa aktibong pagpakabana sa kamatuoran.
Hinuon, diskarte lang ang pagsaksi ubos sa pagkonsiderar sa kaugalingong seguridad.