Editoryal: Ubang imprastraktura ‘makalibog’

Editoryal: Ubang imprastraktura ‘makalibog’

Kinsa ang ‘nanag-iya o responsable’ sa skywalks? Nitumaw kini nga pangutana nunot sa plano nga pagguba sa duha ka mga skywalk nga naagian sa Cebu Bus Rapid Transit (CBRT) project sa Osmeña Boulevard sa dakbayan sa Sugbo.

Ang CBRT management nangayo og tabang sa Cebu City Council, diin wala pa nakahukom atol ning pagmantala tungod sa pagpangayo og legal opinion sa hingtungdan nga mga buhatan sa kagamhanan.

Subay sa taho, si CBRT manager Norvin Imbong nihangyo sa Konseho sa pagpasar og resolusyon sa pag-asumir sa City Government sa pagpanag-iya niini ug motugot sa demolisyon sa duha ka mga skywalk nga duol sa Cebu Normal University (CNU) ug dapit sa Fuente Osmeña Circle.

Apan, ang hangyo ni Imbong nakasugat og pagsupak sa pipila ka mga sakop sa Konseho nga nagkanayon nga sila mahimong makasuhan kon motugot sa hangyo sa nahiuna.

Sumala sa mga ningsupak, kini gitukod sa pundo sa Nasudnong Kagamhanan ug ang proyekto gipatuman sa Department of Public Works and Highways (DPWH).

Matod sa suwat ni Imbong, ang iyang buhatan nangayo na og patugot sa DPWH Cebu City District Engineering Office, Department of General Services, and Local Government Audit Sector, apan napakyas kini sa paghatag og mga dokumento sa panag-iya sa duha ka mga skywalk.

Alang sa mga hamtong nga lungsoranan sa dakbayan, makahinumdom seguro nga kining usa sa duha ka gitumbok nga skywalk kabahin sa mga proyekto ubos sa buhatan ni anhing kongresista Raul del Mar sa North District sa Dakbayan.

Mao usab kini resulta sa mga kongresista, imbes tigpanday og balaod, nakigsalo na sa pagtuman og mga proyekto sa ilang distrito.

Laing hinungdan na ba usab kaha kini sa kalangay sa CBRT Phase 1? Una nang gisaad sa kontraktor nga mahuman kini sa dili motapos ning tuiga. Sus, kon mao, mangandam na lang kita sa trapik pa more, labina panahon sa Pasko.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph