Duna na say planong magbutang og flyover sa N. Bacalso Avenue gikan sa eskina sa Osmeña Boulevard hangtod sa may Mambaling, Dakbayan sa Sugbo.
Sa naandan, ang tumong sa pagbutang og flyover mao ang pagsulbad sa trapiko sa dapit diin kini molagbas. Apan kon basehan ang nangaging mga flyover nga nagbarog na karon sa nagkadaiyang mga dapit sa Metro Cebu, makasulbad lang kini sa makadiyot sa trapiko. Sa ngadto ngadto, maghuot ra gihapon ang mga sakyanan.
Di ba maayo nga huwaton na lang ang mga planong pagpalambo sa public transport, sama sa Bus Rapid Transit (BRT) ug monorail? Mga public transport nga gitumong aron pagpaminos sa mga sakyanan sa kadalanan kon makita kini sa publiko nga epektibo. Mao ni ang tumong sa pubic transport.
Inay magtukod og mga flyover, nganong di man hinuon paspasan ang pagtukod sa mga imprastraktura nga magsuporta sa mga public transport?
Tan-awa ra gud nang Mambaling flyover ug underpass, nakasulbad ba sa trapiko? Ang underpass lisod maagian sa mga sakyanan kon magbunok ang uwan kay dali nga bahaan. Maghuot usab ang mga sakyanan kon ting-uli na o rush hour.
Bisan pag pila ka mga flyover ang tukuron, kon way puas ang pagpanaghan sa mga sakyanan ug way bag-ong mga karsada nga buksan, maghuot gihapon ang trapiko sa kadalanan. Namatud-an na kini sa Metro Manila nga napuno sa mga flyover, apan wa makasulbad sa paghuot sa trapiko.
Ngano sab kaha nga ang mga proyektong imprastraktura motumaw man matag mag-angat ang eleksyon? Mao nang magduda na hinuon ang publiko nga tipik kini sa fundraising alang sa kandidatura sa usa ka pulitiko. Mas maayo pang ipadaplin lang una sa Department of Public Works and Highways (DPWH) kining mao nga proyekto ug tutokan ang dugay nang mga imprastrakturang nalangay og maayo ang pagtukod.