Paspas ang kalamboan sa Sugbo, labina sa tulo ka highly urbanized cities. Apan ang usa sa mga nag-unang imprastraktura alang sa kuryente ug telekomunikasyon hinay nga nagdis-og. Sama sa mga kable nga gipakutay sa mga poste nga naghatag og kangil-ad sa mga siyudad.
Gitawag na kini og spaghetti wires kay susama na og spag tan-awon nga nanglumbid sa kadaghan.
Di lang kangil-ad, kakuyaw sab sa mga motorista tungod sa mga wire nga mangaputol nga mangumbitay sa mga karsada.
Dali ra sab kaayo ning maapektuhan sa dagkong mga katalagman, sama sa bagyo, kay mouban man sa pagkaputol o pagkatumba sa mga poste.
Ang bagyong Odette nakapahigmata sa kagamhanan ug sa pribadong sektor sa kahuyang sa kasamtangang imprastraktura niini ug sa kadako sa iyang epekto ngadto sa populasyon.
Nangaputol ang supply sa kuryente ug komunikasyon, duha ka mahinungdanon kaayo sa modernong panahon karon. Way kuryente busa way tubig. Way internet, way hapit patigayon tungod kay hapit tanan, labina sa banking industry, nahigot niini.
Ang komunikasyon apektado usab kaayo sa pagkawala sa supply sa kuryente, gawas sa pagkaputol sa ilang kaugalingong linya nga delikado usab kaayo.
Ang plano karon nga pagdala sa ideya sa underground cabling sa tanang mga linya sa kuryente ug komunikasyon ngadto sa Regional Development Council (RDC) uwahi na unta kaayo. Niadto pa unta, gikonsiderar na kini sa mga opisyal sa kagamhanan ug sa uban pang stakeholders tungod kay kining duha ka mga industriya nga tagan-an niini dako kaayo og epekto, gikan sa mga sakop sa labing taas nga hut-ong sa katilingban ngadto sa labing yano nga lumolupyo ning modernong panahon.
Dako tinuod og gasto kining underground cabling, apan matod sa Dept. of Information and Communications Technology (DICT 7) nga pangitaan og paagi nga di kaayo kini mahal.
Duna nay andam nga mohimo sa underground cabling, diin ang mga kompaniya sa utilities mahimong moabang kanila aron pagbawi sa puhonan.
Ang kamahinungdanon sa underground cabling taas kaayo. Bisan sa kadako sa iyang gasto, di matumbasan ang kamahinungdanon kaayo. Kon tan-awon gani, ang investment niini mabawi ra sa utilities tungod kay kon dunay kadaut, gamay ra kaayo itandi nianang naa pa kini sa ibabaw sa mga poste.