NAKASUGAT man tuod og negatibong reaksyon gikan sa mga netizens, apan daw og anaa mopabor sa usa ka transgender nga si Gretchen Diez ang huyohoy sa hangin.
Kini may kalabutan sa nag-viral sa social media sa dihang gidakop ug gipusasan siya sa usa ka janitress sa dakong mall didto sa Kaulohan tungod kay didto man kini mosulod sa comfort room sa mga babaye.
Tungod sa pagkatap niini sa social media nga gisumsoman gilayon sa mga netizens, midako ang maong isyu ug gani nakakuha og atensiyon sa senado ug ni Presidente Rodrigo Duterte.
Ang paggamit ni Gretchen sa pulong nga “discrimination” ngadto sa mga susama kaniya nga sakop sa LGBT maoy iyang gisakyan aron makakuha og publisidad ug sempatiya sa publiko.
Ug tuod man wa gyud siya masayop kay mikagat man sab dayon ang pipila ka mga pulitiko nga kunohay nagpakita og suporta kaniya iyang baruganan.
Pero ang pangutana, duna bay discrimination sa maong hitabo? Nganong mo-claim man si Gretchen og discrimination nga wala man siya did-i sa paggamit sa CR sa mga lalaki, sigon sa estado sa iyang pagkatawo?
Bisan unsaon pa niya sa pagpagwapa ang iyang kaugalingon, sa mata sa mga tawo ug sa Kahitas-an, gihuimugso siya nga usa ka lalaki.
Ug ang pagsulod niya sa CR sa mga babaye usa na ka kalapasan kay iya mang gisupak ang pagkapribado o privacy sa mga kababayn-an.
Unsa may siguridad unya sa mga babaye kon kon sundon kini sa ubang lalaki nga magpaka-aron ingnong babaye, pero ang katuyo-an mao ra diay ang paglili o kaha pagpahimulos sa kahigayonan?
Sa laktod nga pagkasulti, dili discrimination ang isyu sa maong hitabo kon dili dunay violations nga iyang nahimo ang di usab maki-angayon nga pagpusas sa janitress ngadto kaniya.