Kon basehan ang Local Government Code, ang mga local chief executive dunay iyang kaugalingong mga gahom, labina niadtong naa sa highly urbanized cities. Ang mga mayor niini dunay kaugalingong gihangrian.
Sama sa Siyudad sa Sugbo, ang dunay labing dako og gahom mao si Mayor Michael Rama human napili sa eleksyon sa miaging tuig. Angay siya sa respeto isip mayor sa siyudad.
Apan ang mga opisyal sa Cebu Port Authority (CPA) ingon sa wa magtahud kaniya tungod kay bisan gani ang pagpanglimpyo sa mga kawani sa Dept. of Public Services (DPS) unta sa Compania Maritima gibadlong sila sa mga gwardya.
Bisan tuod kon dunay nagpadayong kaso niini sa korte, tugtan unta sa CPA ang Siyudad sa pagbuhat sa iyang gimbuhaton nga mao ang pagpanglimpyo, apil na ang Compania Maritima.
Dihang wa pa kini atimana sa Cebu City, ang mao nga dapit hugaw kaayo, gipuy-an sa mga street dweller, gihimong labayanan sa hugaw sa tawo. Ingon sa nakalimtan sa panahon ang dapit.
Nalimpyo lang kini dihang ang Siyudad uban sa private developer nga Megawide, nilimpyo sa dapit isip tipik sa modernisasyon sa merkado publiko sa Carbon.
Human giukopar sa CPA ang dapit tungod sa kamandoan sa korte, nabalik na sab ang kahugaw sa dapit kay nagpasad ang mga basura ug uban pa. Kay hugaw, natural nga limpyuhan. Ang buhaton unta sa Siyudad di man makadaut sa dapit, mas makaayo man.
Di usab ni makaapekto sa kaso sa pagpanag-iya sa dapit tungod kay gimbuhaton sa DPS ang pagpanglimpyo, apil na sa Compania Maritima nga maisip nga public property ug naa pa su’d sa jurisdiction sa Siyudad ug duol sa city hall. Duol sab sa merkado publiko.
Natural lang nga masuko si Rama sa CPA og maayo human sa ilang gibuhat tungod kay pagpakita kini sa kakuwang og respeto kaniya isip amahan sa siyudad. Unsa may interest sa CPA sa dapit nga layo na man gani kini sa dagat?